گۆتار

ئێزدى ژى پێكهاته‌یا حه‌فت ره‌نگا كوردستانێ یه‌

 

نه‌وزاد هلۆرى

هه‌ند جاران د كه‌ش و هه‌وایه‌كێ باراناوى دا ژ نیشكه‌كێڤه‌ تشكێن رۆژێ ده‌ردكه‌ڤن، دوڤ دا ئێكسه‌ر حه‌فت ره‌نگ (كه‌سك و سوور) درۆست دبیت، ئه‌ڤ حه‌فت ره‌نگه‌ ل وى ده‌مى درۆست دبیت ده‌ما كو ب درۆستى حه‌فت ره‌نگ تێكه‌لى هه‌ڤ دبن و بێى ئێك ژ وان ره‌نگان حه‌فت ره‌نگ ژى درۆست نابین.

بڤى ره‌نگى ئێزدى وه‌كو كه‌مینه‌ ئاین ل كوردستانێ، ئه‌و ژى به‌شه‌كێ سه‌ره‌كیێ ژ ره‌نگێن كوردستانێ یێن ئاینى و نه‌ته‌وه‌ى پێكدئینن، بێ هه‌بوونا ئێزدى ل كوردستانێ ره‌نگه‌ كارتێكرنێن نه‌رێنى لسه‌ر درۆستبوونا پێكهاته‌یا ئاینى درۆست ببیت.

ژ بوو ونداكرنا ئولا ئێزدى ل ده‌ما بورى چه‌ندان نه‌خوشى كه‌فتینه‌ د رێیا وان دا، دوماهى جار ژى لسه‌ر ده‌ستێ تیرورستێن داعش بویه‌، به‌لێ ژبه‌ركو ئێزدیاتى ئێكه‌ ژ پێكهاته‌یێن سه‌ره‌كى یێن پێكڤه‌ ژیانێ ل كوردستانێ و ته‌مامكه‌را حه‌فت ره‌نگێ یه‌، هه‌ر مایه‌ و دێ هه‌ر مینیت ژى.

ره‌نگه‌ گه‌له‌ك هزر بكه‌ن كو ره‌فتارێن داعش و داروده‌سته‌كێن مینا وان، ژ ئیسلامێ یه‌، به‌لێ ئه‌ڤ یه‌ك ره‌فتاره‌ك شاشه‌ و ئیسلام و ئَێزدیاتى چوو دژایه‌تى ل گه‌ل هه‌ڤ ئینن، و هه‌ر ئاینه‌ك لسه‌ر په‌یروه‌ و پروگرامێ خوه‌ دچیت و هه‌ر ئێك ژ وان ژى دروشم و بنه‌مایێن خوه‌ هه‌نه‌ و كه‌س ژ وان دژى ییێ دن په‌یره‌و نینه‌ و هه‌ردوو ئاین ژى گرنگیێ ب پێكڤه‌ ژیانێ دده‌ن، چه‌وا هه‌ند گروپ و لایه‌ن و كه‌س بزاڤا نه‌هێلانا ئاینێ ئێزدى دكه‌ن، ب هه‌مان شێوه‌ هنده‌ك بزاڤا نه‌هێلانا ئیسلامێ ژى دكه‌ن، به‌لێ بو هه‌مووان روون و ئاشكرایه‌ كو ئه‌و گروپ و لایه‌ن نونه‌رێن ئیسلام و ئێزدى نینن، به‌لكو ئێزدى و ئیسلام و هه‌موو ئاینێن دن پێكڤه‌ حه‌فت ره‌نگا كوردستانێ درۆست دكه‌ن.

حوكمه‌تا هه‌رێما كوردستانێ ب رێیا وه‌زاره‌تا ئه‌وقاف و كاروبارێن ئاینى نونه‌راتیا راسته‌قینه‌یا پێكڤه‌ ژیانا ئاینى و نه‌ته‌وه‌یى دكه‌ت، تنێ وه‌زاره‌تا ناڤبرى مافێ دژاتیا هه‌ر گرۆپ و ئاین و نه‌ته‌وه‌یه‌كێ هه‌یه‌ ئه‌گه‌ر بزانیت بویه‌ ئه‌گه‌را تێكدانا ره‌وشا حه‌فت ره‌نگیێ ل كوردستانێ، ئێزدیاتى ئێكه‌ ژ وان ئاینان كو نونه‌راتیا خوه‌ ل حوكمه‌ت و وه‌زاره‌تا كاروبارێن ئاینى هه‌یه‌، ژبه‌رڤێ نه‌ ئێزدیاتى و نه‌ژى موسلمان و هه‌ر ئاینه‌كێ دن دڤێت دگران و شه‌پرزه‌ نه‌بیت ب هه‌ر كریار و ره‌فتاره‌كا دره‌ندانه‌ ژلایێ چه‌ند گروپ و رێكخراوان دژى ئاینێ به‌رامبه‌ر دهێته‌كرن.

ئێزدى وه‌كو ئێك ژ ره‌نگێن كوردستانێ دپێناڤ پاراستنا ناسناما خوه‌ یا ئاینى هه‌زاران قوربانى داینه‌ و به‌رده‌وام هاتینه‌ ته‌په‌سه‌ركرن و ل ڤێره‌ و وێرا هه‌نێ كاره‌سات و كومكوژى ب سه‌رێ وان هاتینه‌، ب تایبه‌تى ژى به‌رامبه‌ر ره‌گه‌زێ مێ.

تشتێ مایى كو ئه‌ز بێژم ئه‌وه‌ كو هه‌موو ئاینان ل كوردستانێ مافێ ژیانێ هه‌یه‌ و ئازادن چه‌وا ره‌فتارێ بكه‌ن، هه‌موو ئاین ژى لژێر سیبه‌را ئالایێ كوردستانێ دشێن كارو و خه‌باتا خوه‌ بكه‌ن و پاراستنێ لسه‌ر بنه‌ما و ناسناما خوه‌ بكه‌ن، هه‌ر كه‌سێ سه‌رپێچیێ لسه‌ر بكه‌ت پێدڤى یه‌ ب زوترین ده‌م بهێته‌ سزادان.

زێدەتر ببینە

بابه‌تێن ب ڤێ مژارێ ڤه‌ گرێدای

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Back to top button
Close