فولکلۆر و کەلتورێ دەڤەرا شنگالێ بەرەڤ کوڤە؟

 

خێرۆ گرعزێری

هەر ژ سەردەمێن کەڤن دا و بەری هەزارێن سالان هەر مللەتەك خودان فولکلۆر و کەلتورەکی خوە یێ تایبەت بوویە و ئەو فولکلۆرە گرێدای دیرۆکا وی مللەتی بوویە.

ئێزدی و شنگالی ژی مینا هەموو مللەتێن دی خوەدان فولکلۆرەکی گەلەك کەڤن و دێرینن و ئەڤ فولکلۆر و کەلتورە ژئالیێ ئێزدیانڤە هاتیە پاراستن و هەتا ڤێ گاڤێ ژی گرنگی پێ هاتییە دان و د مەیدانا فولکلۆرێ دەڤەرێ دا ژی خودان ناڤ و دەنگەکی گەلەك بەرز و بلند و دەولەمەند هەیە.

فولکلۆر و کەلتورێ هەر مللەتەکی ناسنامە و دیرۆکا وی مللەتی ددەتە خوەیاکرن و نیشاندان، شنگال ژی ب فولکلۆر و کەلتورێ خوە ناڤداربوویە و سەرەنجا خەلکێ بیانی و یێ دەڤەرێ ژی بەرەڤ خوە راکێشایە.

ئێزدیێن شنگالێ ژی ب هەموو کارینێن خوە ئەڤ فولکلۆرە پاراستینە و بەردەوام چاڤدێری لێکرینه، لێ پشتی کۆمکوژیا ڤێ دوماهیێ ئەوا ل 3ی تەباخا سالا 2014ێ ل شنگالێ و دەوروبەرێن وێ رابووی کاریگەریەکە نەرێنی ب گشتی لسەر دەڤەرێ هەبوویە و ب تایبەتی لسەر فولکلۆر و کەلتورێ شنگالێ و دبینن کو ئاستێ فولکلۆری بەرەڤ لاوازیێ چوویە و هندەک جاران دبینن ژی کو ئەڤ فولکلۆرە هەر ژئالیێ سترانبێژان بخوەڤە دهێتە پشتگۆهاڤێتن و دوور ژ ڤی فولکلۆری سترانێن شنگالی دبێژن ئەڤ چەندە ژی مەترسی یە لسەر فولکلۆرێ ڤێ دەڤەرێ.

لەورا و ژبەر نە گرنگی پێدانا حکومەتێ و ئالیێن کاربدەست و نە دامەزراندنا سەندیکەک یان ناڤەندەکا هۆنەری ل شنگالێ و پاراستنا ئالاڤێن کەلتوری و فولکلۆرێ یێن دەڤەرێ، ئەڤ کەلتورە هێدی هێدی بەرەڤ کێمبوونێ و دکارن بێژن تا رادەیەکی بەرەڤ نەمانێ ژی دچە.

ژبەر وێ یەکێ ژی پێدڤی یە ل سەر هەموو جهەکی و تایبەت ئیدارەیا قەزا شنگالێ و ئالیێن دی یێن کاربدەست هندەك مۆزەخانە و جهێن تایبەت ل دڤەرێ ڤەکەن کو تایبەتبن ب فولکلۆر و کەلتورێ ئیزدیان و شنگالێ ژبۆ بهێزکرن و ساخکرنا وی و گرنگی دانا فولکلۆرێ دەڤەرێ و ژبۆ وندا نەکرن و پاراستنا وی و پێدڤییە گرنگی ب تشتێن فولکلۆر و کەلتوریڤە گرێدای بهێته دان و پتر ئالاڤێن کەلتوری بەربەلاڤببن و نەهێنه پشتگۆهـ هاڤێتن دا کو ئەو خەبات و خزمەتا نەوەییێن بۆری ژبۆ هاتییە کرن نەهێته ونداکرن و بەردەوامی ب گەشەکرن و ناڤ و دەنگیا وی بهێتە دان و رامانا پەیڤا فولکلۆر و کەلتوری بۆ گەنجێن پاشە رۆژێ بهێتە راڤەکرن و شرۆڤەکرن داکو ژئالیێ وانڤە ژی پتر گرنگی پێ بهێتە دان و نەهێتە ژبیرکرن و ب زندی بمینێ و ببیته هێمایێ خوە راگریا دەڤەرا شنگالێ و ئیزدیان.

زێدەتر ببینە

بابه‌تێن ب ڤێ مژارێ ڤه‌ گرێدای

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Back to top button
Close