راپورتنووچە

رزگاربوویێن ئێزدی داخوازا یەکەیێن ئاکنجیبوونێ دکەن

 

ئێزدی 24 _ لەیت حسێن

قۆناغا پشتی رزگارکرنا رەڤاندیان ژبن زولم و ستەما ئالیێ زولمکار ژ قۆناغێن هەرا گرنگە و پێدڤی یە رێکخراوێن مافێ مرۆڤی یان ژی حکومەت و ئالیێن پەیوەندیدار کار لسەر گونجاندنا کەش و هەوایەکی باش بۆ وان رزگاربوویان بکەن ژبۆ رەوشا وان بەرەڤ باشیێ بچیت.

ل پاش کۆمکوژیا داویێ ئەوا بسەرێ ئێزدیان هاتی ل قەزا شنگالێ ل باشووری پارێزگەها نەینەوا ل باکووری عیراقێ و رەڤاندنا ب هەزاران کەسێن ئێزدی لسەر دەستێ رێکخراوا تیرۆرستیا داعش و ب رێکێن جودا جودا هژمارەک ژ وان هاتە رزگارکرن لێ ئەو رزگاربوویە ژ خزمەتگوزاری و هاریکاریێن ژ وان را دهێنە پێشکێشکرن درازی نینن و دبێژن رەوشا وان دناڤا کەمپان دا یا ب زەحمەتە لەورا دخوازن یەکەیێن ئاکنجیبوونێ بۆ وان بهێنە دابینکرن.

نەورۆز حەسەن خەلەف رزگاربوویەکە ئێزدی یە و نێزیکا دوو سالایە ژ دەستێ رێکخراوا تیرۆرستیا داعش رزگاربوویە ژ ئێزدی 24 را گۆت، پشتی رزگارکرنا مە ژ دەستێ داعشێ رەوشا بەرەڤ باشیێ ڤە چوو و ب شێوەیەکی گشتی هەر جهەکی ئەم ب چنێ رێزەکا گەلەکا باش ل مە تێتە گرتن، لێ براستی وەک پێدڤی هاریکاری و پشتەڤانیا مە ناهێتە کرن.

نەورۆزێ خوەیاکر، مە ل دەستێ داعشێ دا ئێش و ئازارێن زۆر کێشان و رەوشا مە گەلەکا ب زەحمەت بوو و مە هند نەخوەشی ل زیندانێن داعش دا دیتن لێ پشتی ئەم رزگاربووین و دناڤ کەمپان دا ئاکنجی بووین رەوشا مە هەرا بزەحمەتە و جوداهیەکا هۆسا مەزن دناڤبەینا رەوشا خوە دا ئەم نابینن هەر رەوشا مە یا بزەحمەتە ژبەر کو هیچ ئالیەک وەک پێدڤی خوە ل مە ناکەتە خودان و ب شێوەیەکی گشتی رەوشا هەموو ئاوارەیان بزەحمەتە لێ یا رزگاربوویان ژ وان بزەحمەت ترە لەورا ئەم ژ هەردوو حکومەتان دخوازن کو یەکەیێن ئاکنجیبوونێ بۆ مە بهێنە دابینکرن دا کو ئەم بکاربن ب ئارامی ژیانا خوە برێڤە ببەن چونکی هەر ماوەیەکی حالەتێن نەخوەش وەک سۆتنێ و مرنێ وهتد دناڤ کەمپان دا رووددەن و ب ڤێ ئەگەرێ ژی رەوشا دەروونی یا رزگاربوویان تایبەت ژی ئەوێن نوو هاتینە رزگارکرن ب دیتنا ڤان جۆرە دیمەنان خراب تر لێ دهێت.

وێ رزگاربوویا دەستێ داعش زێدەتر گۆت، دڤیابا خۆلێن هەمەرەنگ و تایبەت ژی یێن دووبارە شایاندنا دەروونی بۆ رزگاربوویان هاتبانە ڤەکرن دا کو مە خوە پێ ژبیرڤە کربا و هەر چ نەبیت ئەم هندەکێ ب کارێن هۆساڤە مژویل بووبان تایبەت ژی بۆ وانێن نوو هاتینە رزگارکرن دا کو ل ژیانا خوە یا سروشتی ڤەگەرن و ب پێدڤی ژی دزانن کو سەنتەرێن ڤان جۆران ژمەرا ل کەمپان دا هاتبانە ڤەکرن چونکی هندەک ژمە ل جهێن دوورن ژ باژێران و مە ئەو شیانێن مادی نینن کو هەر چەندەکێ سەرەدانا رێکخراوان ل ناڤەندێن باژێران بکەن و هەروەسا پێدڤی یە بۆ هەر جۆرە هاریکاریەکێ ئەم یێن ئێکێ بن و دەرفەتێن کاری ژی ژمەرا بهێنە دیتن.

ل داویا ئاخفتنا خوە دا خوەیاکر ژی، تشتێ هەرا گرنگ و پێدڤی ژمەرا ئەوە کو بزاڤێن دروست بهێنە کرن بۆ رزگارکرنا وان کەسوکارێن مە ئەوێن هەتا ل نهوە دەستێن تێرۆرسێن داعشێ دا ژبەر کو ئەم دزانن کا نهوە ئەو د چ رەوش داینە و ژیانا وان چاوا دەرباس دبیت.

سوزان سەفیل رزگاربوویەکە دی یا ئێزدی یە ژ دەستێ داعش وەسا ژ ئێزدی 24 را پەیڤت و گۆت، ل 3ی ئابا 2014ێ و پشتی کو داعش ئەم رەڤاندین مە گەلەک ئێش و زەحمەت ل زیندانێن وان دا دیتن هەروەها پشتی کو ئەم هاتینە رزگارکرن ژی وەک پێدڤی هاریکاری ژمەرا نەهاتینە پێشکێشکرن.

گۆتژی، ئەم نهوە ل ناڤ کەمپان دا ئاکنجی نە و رەوش ل کەمپان دا گەلەکا بزەحمەتە و ئەم ژ هەموو خزمەتگوزاریان دبێ بەهرن و وەک کا چاوا مە قوربانی دایە هۆسا خزمەتا ناهێتە کرن و ئالیێن پەیوەندیدار ژی خوە لسەر ڤێ یەکێ بێ دەنگ دکەن و ئەو ژی جوداهیێ دکەنە هاریکاریکرنا رزگاربوویان دا و نە لسەر وی بنەمایی هاریکاری پێشکێشی رزگاربوویا تێنە کرن.

سوزانێ خوەیاکر ژی، ئەم داخوازا یەکەیێن ئاکنجیبوونێ دکەن و مە دڤێت حکومەت ژمەرا بەرھەڤ بکەت و ئەم بهێنە ڤەگوهاستن بۆ جهێن باشتر ژ کەمپان چونکی براستی ئەڤ جهە نە یێ باشە بۆ ژیانێ و ل ڤر ئەم گەلەک نەخوەشیا دبینن.

ل داویێ ژی گۆت، هیڤی دکەن رێکخراوێن مافێ مرۆڤی و ئالیێن پەیوەندیدار پتر خوە ل رزگاربوویان بکەنە خودان و هاریکاریێن پێدڤی پێشکێشکی مە بکەن ژبەر کو ب ڤی ئاوای بیت رەوشا مە یا دەروونی وەک رزگاربووی و تایبەت ژی یا ئەڤێن ڤێ داویێ رزگاربووین دێ بەرەڤ خرابتر چیت.

زێدەتر ببینە

بابه‌تێن ب ڤێ مژارێ ڤه‌ گرێدای

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

دووماهی

Close
Back to top button
Close