راپورتنووچە

پێنج سال بسەر کۆمکوژیێ دا دەرباس دبن.. رۆلێ ناڤخۆی و نیڤ دەولەتی و گوهۆرینێن چێبووین چینە؟

 

ئێزیدی 24 _ تەحسین شێخ کالۆ

بیرەوەریا پێنجێ یا کۆمکوژیا ئێزدیان نێزیک دبیت، و هیش کچ و ژن ئێخسیرن لبا رێکخستنا دەولەتا ئیسلامی “داعش”، و هژمارا گۆرێن بکۆم و قوربانیا زێدەدبیت، و ئێش و ئازارێن ئاوارەیان ل کەمپان دا بەردەوامن، هەر چەندە پارێزگەهێن کەفتینە دەستێ داعش ئەڤ چەند سالن هاتینە رزگارکرن، و هندەک وەلاتی ژ وان ل وێ کۆمکوژیێ و تاوانێن ل دەرهەقا ئێزدیان دا بەشدارببوون، و ژیان نوو بۆ ڤەگەریایە، لێ هەتا نهوە ئێزدی لهیڤیا ڤەگەریانا گرتیان و ڤەگەراندنا ژیانێ نە بۆ شنگال و دابینکرنا خزمەتگوزاریانن.

چالاکڤان “میرزا دنای” ژ ئێزیدی 24 را گۆت، گوهۆرینێن دمەیدانا ئێزدیان دا رووددەن ئەو خرابترین تشتن کو ل سالێن چووی بسەرێ ئێزدیان هاتینە، و ئەو ئەگەرێ ژ دەستدانا ئیرادەیا خەلکێ شنگالێ و نە ئێک رائیا لدۆر کەیسێن پاشەرۆژێ یە، جهێن کو کۆنترۆلا ئیرادە ئێزدیان دکەن ئەو بەرپرسێن سەرەکی نە ژڤێ یەکێ ل شنگالێ هیج رێککەفتنەکا عەسکەری و ئیداری نینە و ئەڤ چەندە هۆسا ل وەلاتیێن ور دکە دگرێدای بن دناڤبەینا کەمپان و رەوشا ماددی با بزەحمەت.

دنای دبینیت، رۆلێ حکومەتا عیراقێ و هەرێما کوردستانێ نە ل گۆری ئاستێ پێدڤی یە لدۆر کەیسا ئێزدیان و دبینم حکومەتا عیراقێ هەتا نهوە شکەستن ئانی ل دیتنا ئەردەکێ قانونی یێ دروست ژبەرکو یاسایێن عیراقێ دڤالاینە ژ مادەیێن تاوانێن نیڤ دەولەتی. لەورا چ پێشکەفتن بخوەڤە نە دیتیە و کەسوکارێن قوربانیان هەست ب پشتگۆهاڤێتنێ دکەن هەروەسا نە یەکلاکرنا کەیسا عەسکەری و ئیداری ل شنگالێ بەرپرساتیا حکومەتێ یە کو ژڤی ئالی ڤە ژی یا کێمتر خەمبوویە.

لدۆر کەیسا پاراستنا نیڤ دەولەتی ژی دنای خوەیاکر، دبینم کو پشتەڤانیەکا مەعنەوی ژئالیێ جڤاکا نیڤ دەولەتی ڤە بۆ کەمینەیان هەیە ل عیراقێ و گڤاشتنەک لسەر هەردوو حکومەتێن عیراقێ و هەرێمێ هەیە بۆ دانا مافێ کەمینەیان و دا بزانن کو چ وەلاتێ جیهانێ عەسکەرێ خوە ناشینە بۆ پاراستنا مە لەورا دڤێت ئەم بزانن کا دێ چاوا خوە پارێزن ب هەماهنگیا دەولەتێ و ب پشتەڤانیا جڤاکا نیڤ دەولەتی و نهوە ئەڤ دەرفەتە هەیە. و سەبارەت کەیسا ناساندنا جینۆسایدێ نەهـ وەلاتان و ئێکەتیا ئۆروپی و جڤاتا ئۆروپی دانپێدان ب ڤێ کەیسێ کریە لێ دانپێدانا یاسایی پێدڤی ب دادگەها هەیە، کو نیڤ دەولەتی بیت یان ناڤخۆی کو تایبەت عیراقێ ناڤێت بچتە ناڤ سیستەمێ رۆما، لەورا چ دادگەهـ ل دادگەها جنائی نابیت.

دنای گۆتژی، ناما مە ل بیرەوەریا پێنجێ یا کۆمکوژیا ئێزدیان بەری ئەم ئاراستەی جیهانێ بکەن ئەم ئاراستەی خەلکێ خوە دکەن کو هەموو ل هەڤ روونن ب دلەکی و دەنگەکی یەکگرتی ژبەرکو ئەڤە دەرەفەتا مەیا داوی یە و هەکە مە ژ دەست هیچ ئالیەک نینە ل پاشەرۆژێ دا دگەل مەبیت، لەورا دڤێت ئەم دوور ژ هەر تشتی ل بن چادرەکێ دا ل هەف کۆمببەن.

ژئالیەکی دی ڤە نڤیسەر “خالد تەعلۆ قائدی” ژ ئێزیدی 24 را خوەیاکر، بیرەوەریا پێنجێ یا کۆمکوژیا ئێزدیان نێزیک دبیت لێ هیش رێژا 80% ژ خەلکێ شنگال ئاوارەیە و کەیسا ئێزدیان یەکلانەبوویە و هیش ئێش و ئازارێکی مە وەک ئاوارەیێن ئێزدی دبەردەوامن و کەیسا ئێزدیان رۆناهی بخوەڤە نەدیتیە.

قائیدی ئاماژە ب وێ یەکێ ژی کر، هندەک نیشانێن پۆزەتیڤ وێ تێنە دیتن و یا هەرە گرنگ ڤەکرنا گۆرێن بکۆم بەشێوەیەکی فەرمی ژ 15ی ئادارا چووی، هەروەسا پرۆژێ یاسایا رزگاربوویێن ئێزدی ژبیرناکن لێ نە بڤی سەروبەری کو هندەک ژ خالێن ڤی پرۆژەی پێدڤی ب چەند گوهۆرینایە دا کو چ کارتێکرنێ لسەر تایبەتمەندیا ئایینێ ئێزدیان نەکەت.

دا زانین ژی، چەند گوهۆرینێن باش ل ڤان سالێن چووی دا لسەر کەیسا ئێزدیان هاتینە کرن ژبەرکو ئێزدیان دڤێت ڤەگەرن سەر جھ و وارێن خوە لێ ئەوژی ب دابینکرنا خزمەتگوزاریان و پرۆژایە، و هەروەسا پشتەڤانیەکا نیڤ دەولەتی ژی بۆ کەیسا ئێزدیان هەیە و ب قۆناغێن باش پێشڤەچوون ب خوەڤە دیتیە تایبەت ژئالیێ چەند وەلاتان ڤە لێ لسەر ئەردێ نەهاتینە جێبەجێکرن.

تەعلۆ پەیڤا خوە ب نامەیەکێ ب داوی ئانی ئەوژی، ب دوماهی ئانینا ململانیێن سیاسی ل شنگالێ و چارەکرنا کێشەیێن ل ور و هەلبژارتنا حکومەتەکێ و ئیدارەیەکێ بۆ دەڤەرێ، و لدۆر رەڤاندیێن ئێزدی ژی گۆت، کەیسا گرتییان ژی وەختەکێ زێدە بر لێ بێ هیچ مفا کو هەتا نهوە چارەنڤیسێ نێزیکی 3000 کەسێ ئێزدی دیارنینە لەورا ژ هەردوو حکومەتان و جڤاتا نیڤ دەولەتی دخوازن کو رەڤاندیێن ئێزدی ژ زیندانێن داعش و کەمپان رزگاربکەت، و دووبارە ئاڤاکرنا دەڤەرێن مە و قەرەپۆکرنا قوربانیان، و ب داوی ئانینا ئێش و ئازارێن ئاوارەیێن ئێزدی ل کەمپان دا و ڤەگەراندنا وان بۆ جهێن وان ب نێزیکترین دەم، و بلەزکرن بۆ دۆکیومێنتکرن و ڤەکرنا هەموو گۆرێن بکۆم ژبەرکو کار گەلەک هێدی برێڤە دچیت ب جیاوازی ل گەل هژمارا زێدە یا گۆرێن ب کۆم.

زێدەتر ببینە

بابه‌تێن ب ڤێ مژارێ ڤه‌ گرێدای

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Back to top button
Close