گۆتار

کۆمکۆژیا ئێزدیان بوو نە کارەساتا شنگال بوو

 

مەروان داود

ل رۆژا 3ی تەباخا سالا 2014ێ رێکخراوا تیرۆرستی یا داعش هێرشی سەر دەڤەرا شنگالێ و گوند و کۆمەلگەهێن ب سەر وێ دەڤەرێ ڤە کر و هەموو تاوانێن ل دژی مرۆڤایەتیێ ل دەرهەقێ ئێزدیان دا ئەنجام دا ژ کوشتنا زارۆک و خۆرتان و دانعەمران و گرتن و رەڤاندنا ب هەزاران کەچ و ژن و زارۆکێن ئێزدی و هەتا نهوە ژی پتریا وان د بێ سەر و شوونن و خێزانێن وان چ ژێ نزانن، و ئاوارەبوون و کۆچبەربوونا ب هەزاران ئێزدیان ژبۆ دەرڤەیی عیراقێ، و هەتا نهوە ژی پتریا ئێزدیان ل ناڤ خیڤەتان و کەڤالێن نە تامەمبووی دا دژین و د ژیانەکا ب زەحمەت و پەریشان دا رەوشا وان دەرباس دبێ.

ئەڤە بیرەورەیا پێنجێ یا کۆمکوژیا ئێزدیان هات و هیش داخوازێن ئێزدیان و کەسوکارێن قوربانیان نەهاتینە ب جهئینان، لێ جهێ داخێ یە گەلەک جاران ئەم گۆهـ لێ دبن گەلەک کەس لسەر تۆرێن جڤاکی ڤێ کۆمکۆژیا مەزن ب کارەساتێ ب ناڤ دکەن و راگەهاندنا عیراقێ ب گشتی و یا کوردی ژی ب تایبەتی پتریا جاران د راپۆرتێن خوە دا دبێژن کارەساتا شنگالێ دا، لێ د راستی دا ئەو نە کارەساتە و ب چ رەنگان نا وەک کارەساتێ یە ئەو مەزنترین کۆمکۆژی بوو ل چەرخێ بیست و ئیکێ دا ب سەرێ ئێزدیان هات ئەو ب خوە کۆمکۆژیا یان جینوسایدا یان (قتل عام) دڤێت بهێتە ب ناڤکرن ژبۆ کو کەیسا ئێزدیان نەهێتە ونداکرن.

هەکە ئەم ل دویڤ پێناسەیا دروست یا جینۆساید بچن ئەو مالوێرانیا ب سەرێ ئیزدیان هاتی مەزنترین جینۆسایدە، جینۆساید ب خوە ل پتریا جیهانی ل دویڤ ڤێ پێناسێ دهێتە نیاسین جینۆساید زاراڤەکە ژ دوو برگا پێکهاتییە (جینۆ(Genos)
پەیڤەکا گریکیە (یۆنانی) ب رامانا رەگەز یان نفش دهێت
(Caeder) پەیڤەکا لاتینی یە ب رامانا ژ ناڤبرن و قڕکرنێ دهێت. و هەردوو پەیڤ پێکڤە ب رامانا قڕکرنا رەگەزی دهێت.

بکارئینانا زاراڤێ جینۆساید بۆ جارا ئیکێ ژلایێ شارەزایێ یاسایێ یێ پۆلەندی (ڕافائیل لیمیکین) ل مەدرید دکۆنفراسەکیدا ل سالا 1932ێ ب کارئینایە و ل سالا 1942ێ بنڤیسین تۆمارکرییە و ئەڤ تاوانا جینۆساید ل دژی گەلەک ئایینان و گەلا هاتیە بکارئینان و ل سالا 2014ێ مەزنترین جینۆساید د دەرهەقێ ئیزدیان دا ل قەزا شنگالێ هاتە ئەنجامدان.
ژبەر ڤێ چەندێ ب هیڤی نە ژ هەموو دەزگەهێن راگەهاندنێ ئەو پەیڤا کارەسات ل شونا جینۆساید بکارنەئینن دا کو کۆمکۆژیا ئێزدیان نەهێتە ونداکرن.

زێدەتر ببینە

بابه‌تێن ب ڤێ مژارێ ڤه‌ گرێدای

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Back to top button
Close