راپورتنووچە

گوهۆرینا دیموگرافی و کارتێکرنا وێ لسەر پاشەرۆژا ئێزدیان ل وەلات شێخ

ئێزیدی 24 _ لەیت حسێن

ب ئەگەرا هاتنا داعش بۆ شنگال و دەڤەرێن دی یێن ئێزدیان ل عیراقێ هژمارەکا زۆرا خەلکێ ئێزدی تایبەت ژ دەڤەرێن وەلات شێخ کۆچبەری وەلاتێن ئۆروپا بوون و ئەڤێ یەکێ ژی وەلێکر کو گوهۆرینەکا دیار بکەڤتە د دیموگرافیا دەڤەرێ دا، رۆژنامەڤان و کەسانێن ئێزدی ژی ل دەڤەرێن وەلات شێخ دبینن کو ڤێ یەکێ کارتێکرنەکا نێگەتیڤ لسەر پاشەرۆژا ئێزدیان ل دەڤەرێ دێ هەبیت.

“خەلات باعەدری” مامۆستایەکێ ئێزدی یە ژ خەلکێ ناحیە باعەدرێ ژ “ئێزیدی 24” را گۆت: هاتنا داعش بۆ دەڤەرێ وەکر کو وەلاتیێن عیراقێ ب شێوەیەک گشتی و تایبەت ئێزدی کۆچبەری ژ دەرڤەی وەلات ببەن و وەلاتێ خوە ب جھ ب هێلن ئەو ژی ژبۆ لێگەریان بۆ ژیانەکا ئارام و باشتر.

باعەدری خوەیاکر ژی، گەر بەراوردیێ ژ سالێن نەهسەدێ و هەتا سالا 2014ێ دگەل وێ سالێ و هەتا نهوە بکەن دێ بینن کو دڤان پێنج سالان دا رێژەیا وی خەلکێ وەلاتێ خوە ب جھ دهێلیت گەلەک زێدەتربوویە ژ 15 سالێن بەری وی دەمی ئەو چەندە ژی بۆ چەند ئەگەرێن سەرەکی ڤەدگەریت:

1- بارێ ئابووری یێ خراب کو ب ئەگەرا هاتنا داعش بۆ شنگال خەلک تێرە دەرباس دبیت
2- نەمانا باوەریا وەلاتیان ب حکومەتێ ژبەر نە ب جھئینانا سۆزێن خوە یێن بەرێ
3- نە ئێمناهیا دەڤەرێ و ناکۆکیێن دناڤبەینا پێکهات و مەزهەبێن جودا لسەر پۆستێن حکومی

زێدەتر گۆت، ” هەکە خەلکێ نە ئێزدی دەما داعش هاتی ئەردێ خوە ژ دەستدایە ئێزدیان ئەرد و ملک و مال و هەر تشتێ خوە هەی ژ دەستدایە لەورا ل سەر هەموو ئالیێن پەیوەندیدار پێدڤی یە کو هاریکاریا ڤی خەلکی بکەن و پتر پشتگۆهاڤێتنێ ل هەمبەر ڤی خەلکی نەکەن”.

باعەدری د ئاخفتنا خوە دا ئەو ژی خوەیاکر، خەلکێ مە دەما دچتە دەرڤەی وەلات لسەرا چەند پارەیەکی زێدە مالێن خوە دفرۆشیتە خەلکەکێ بیانی کو نە ئێزدی بن لەورا ژی براستی هەر ماوەیەکی هژمارا ئێزدیان ل دەڤەرێن وان ل وەلات شێخ کێمتر دبیت ژبەر ڤێ یەکێ ژی داخوازێ ژ حکومەتا نوو یا هەرێما کوردستانێ و میرێ خوە یێ داهاتی دکەن کو یاسایەکێ بکەنە بەر ژبۆ نەفرۆتنا مالێن ئێزدیان بۆ خەلکەکی دی چونکی ئەڤێ چەندێ کارتێکرنەکا مەزن لسەر پاشەرۆژا ئێزدیان ل ڤان دەڤەران هەیە و ژ بۆ پاراستنا ڤی پێکهاتی ل دڤەرێ ئەم هیڤیدارن کو ئالیێن پەیوەندیدار رۆلێ خوە بۆ ڤێ چەندێ گێرن.

ژئالیەکی دی ڤە “بەختیار قادر” کو رۆژنامەڤانەکی ئێزدی یە ژ کۆمەلگەها شاریا ژ “ئێزیدی 24” را گۆت: پشتى ئێزدى راستى كۆمكوژيێ بووين لسه‌ر ده‌ستێ رێكخراوا تيرۆرستيا داعشێ ل شنگال،پێلا كۆچبه‌ريا ئێزديان ل هه‌موو ده‌ڤه‌رێن ئێزدينشين بۆ ئه‌ورۆپا و وه‌لاتێ ئوستراليا و كه‌نه‌دا ب تايبه‌ت ده‌ستپێكر و هه‌تا نهوە به‌رده‌وامه‌ مخابن ئيرۆ ئێزدى يێ وه‌لات و ئاخا خۆ ژ ده‌ست دده‌ن و ڤێ چه‌ندێ ل ئاينده‌ دێ كاريگه‌ريێن خۆ يێن نيگه‌تيف هه‌بن.

لپەی نێرینا ڤی رۆژنامەڤانی، كۆچبه‌رى بۆ ئێزدیان نه‌ چاره‌سه‌ريه‌ و دڤێت ئێزدى ده‌ست ژ ئاخا خوە به‌رنه‌ده‌ن، دبێژە ل كۆمه‌لگه‌ها شاريا ژى وه‌كو هه‌ر ده‌ڤه‌ره‌كا ديتر ژماره‌كا زۆرا خه‌لكێ چووینه‌ ده‌رڤه‌ى وه‌لاتى لەورا ژی براستی ئەڤێ چەندێ دێ مەترسیا خوە لسەر ئێزدیان هەبیت.

دیارکر ژی، ئێزدی تووشی کۆمکوژیەکا مەزن بووینە و یەک ژ پێکهاتێن سەرەکی یێن ڤی وەلاتینە لەورا ژی ژ حکومەتا هەرێمێ دخوازن کو پتر خزمەت و هاریکاریا ئێزدیان و دەڤەرێن وان بکەت ژبۆ وێ یەکێ کو پێلا کۆچبەریێ زێدەتر نەبیت.

زێدەتر ببینە

بابه‌تێن ب ڤێ مژارێ ڤه‌ گرێدای

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Back to top button
Close