نووچە

مەزارێت ئێزدیا، پشت گوهکرنەکا حکومی و خەرابیا خزمەتا لێ

ئێزدی 24 – دیاب غانم

ئێزدی ژ پێکهاتێن ئەسلیێن وەلاتێ ناڤبەرا هەردوو چەماینە و ب هەزارێت سالا ئەو ل سەر ڤی ئەردی نە، تووشبوونا وان بۆ ب دەها کۆمکوژیا و پشت گوهـ ئاڤیتنا وان ب شێوەیەکی هەردیم ژ با هەمووا ڤەمو ژ هەموو ئالیاڤە تشتەکە کەس نکارێ ئینکار بکە، نەگوهدانا وان رۆژ ب رۆژ تێە سەپاندن.

دوور ژ کوشتن و گرتن و کۆچبەر کرنا وان، هنەک پرسگرێکێت دی ژی هەینە جیهەتێن بەرپرس کارن چارە بکن، ئێزدیا ب دەها مەزارگەهـ هەینە وەک کەنیسەیێت مەسیحیا و مزگەفت و مەزارگەهێت بسلمانا لێ ئەڤ مەزار و مەزارگەهـ هاتینە پشت گوهـ ئاڤیتن ژ با هەمووا ڤە”.

ب بەروڤاژی جهێت پیرۆزێت بسلمان و مەسیحیا، جهێت پیرۆزێت ئێزدیا کەم و کاسیێت وان دزەهڤن هەر ژ کەڤن دا و ئەڤ جهـ بتنێ قوبن بێی چ بنایەت و خرمەتەکا دی وەک هۆلا و جهێن دەستئاڤێ و رێکێت هەکە دچنە بەر.

“مروان عەلۆ”، ژ “ئێزدی 24″ را پەیفت و کەم و کاسیێت هەکە مەزارگەهێت ئێزدیا ژبەر دنالن دانە خوەیاکرن و گۆت، ” ئەم نزانن چما حکومەت مە ب ڤی شێۆەی پشت گوهـ دک، نەئاڤاکرنا دەڤەرێت مە و نەبوونا خزمەتا لێ و رێز لێ نەگرتن ل بۆچوونێت مە ئەم ڤان هەمووا باش دزانن لێ فەرە رێزگرتن ل پیرۆزیێت مە یێت دینی بێە کرن و هەکە نا ئەم نە ژ ڤی وەلاتی نە”.

زێدەتر گۆت، “ئۆلەگەریەکا مەزن ل عراقێ و کوردستانێ هەیە دەمێ ئەم بەحسێ دیانەتا هەمووا دکن و ب تایبەت هەکە بابەت ب ئێزدیا ڤە گرێدای بێ، گوهنەدانا ئێزدیا وەک کەسانێن ڤی وەلاتی تشتەکە کەس نکارێ ئینکار بکە ڤێجا چما گوهـ نادنە پیرۆزیێت مە”؟

هەروسا “عەلۆ”گۆت، ” دەمێ تەوافێت مەزارا تێنە گێڕان و ئێزدی سەردانا وان دکن، هنەک دلئێشانێت راستی هەینە چ خزمەت ل چ مەزاری نینە، ئاڤ ئاسانترین حەوجەیەیا ژیانێ یە و چێدبیت ژ هەموو پێتڤیان بساناهیتر بدەست دکەڤێ لێ ل چ مەزارکی نین، غورفێن پێشوازیکرنا میهڤانا، گەلەک ژ خەلکێن دی یێت نەئێزدی حەزدکن بێنە تەوافا لێ ئەم شەرمێ دکن وان داخوازبکن ژبەر مەزارێن مە بتنێ قوبن نە بتر نە رێیا یەکی ژوان یا دروستکریە نە باغچە و دار و دەستئاڤ ل هەینە”.

ل تالیێ داخوازیەک هەبوو ب رێیا “ئێزدی 24″، “ئەم داخوازێ ژ هەمووا دکن و ژ رێڤەبەریا کاروبارێت ئێزدیا ل هەرێمێ و بەغدایێ کو ژدل کار بکن دا هنەک رێکەچارا ببینن و رەزامەندیا و بڕێن پارەی وەربگرن دا خزمەتا مەزارا پێ بهێتە کرن ، جهێن مە یێت پیرۆز نە کێمترن ژ جهێت پیرۆزێت ئاینێن دی لێ قیمەتا مە ژ یا وان کێمترە ل دەڤ حکومەتێ”.

رێڤەبەرێ کاروبارێت ئێزدیا ل پارێزگەها دهۆک “جەعفەر سمۆ” ژ “ئێزدی 24″ را پەیفت و گۆت،” بتریا دەڤەرێت ئێزدیا ل سنوورێ دەڤەرێت ماددە 140 ژ دەستوورا عراقێ داینە و ژ بەر ڤێ یەکێ و ژبەر ژ ئالیێ ئیداری ڤە سەر ب حکومەتا مەرکەزی ڤەینە ئەم نکارن چ تشتا بکن بۆ خرمەتکرنا مەزارگەها ل وان دەڤەرا”.

هەروسا ئانی زمان،” ئەم دزانن هەکە مەزارەهێت ئێزدیا دحەوجەی گەلەک خزمەتاینە، مە گەلەک خرمەت ژێرە کرینە بەلێ هیژ دحەوجەینە و ئەڤ بابەتە ل پلان داینە و دێ مە دویڤچوونەکا مەیدانی بۆ مەزارا هەبت دگەل گوهدانەکا بەردەوام”.

“وەختێ رێکخستیا داعشا تیرورست بسەر دەڤەرێت ئێزدیا دا گرتی 68 مەزارێن ئێزدیا تەقاندن و ئێکی ئاڤاکرنا وان ب ستویێ خوەڤە نەگرتیە و ئێزدیا ب خوە ئەو مەزار جارەکا دی ئاڤاکرن، ئەڤجا ئەڤ مەزار مەسەلەیا وان ژ یا مەزارێن دی ب زەحمەت ترە ژبەر هەکە ئەو دحەوجەی ئاڤاکرنێ و خزمەتکرنێ هەردوواینە و ئەڤ چەندە دکەڤیە سەر ملێ سەر حکومەتا مەرکەزی”.

زێدەتر ببینە

بابه‌تێن ب ڤێ مژارێ ڤه‌ گرێدای

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Back to top button
Close