نووچە

سەرکردێن کوردی جەژنا جەمایێ ل ئێزدیان پیرۆز دکەن

 

ئێزیدی 24 _ هەولێر

ب هەلکەفتا جەژنا جەمایێ، سەرۆکێ هەرێما کوردستانێ و سەرۆکاتیا پەرلەمانێ کوردستانێ و جێگرێ سەرۆک وەزیران پیرۆزباهی ل ئێزدیان کرن، هیڤی خواستن کو ئەڤ جەژنە ببیتە مایەیا خێر و خۆشیێ و پابەندی و پالپشتیا خۆ دوپاتکرن بۆ رزگارکرنا رەڤاندیێن ئێزدی و کێمکرنا ئازارێن ئێزدیان.

نێچیرڤان بارزانی سەرۆکێ هەرێما کوردستانێ جەژنا جەمایێ ل ئێزدیان پیرۆز کر و دوپاتکر کو دێ بەردەوام بیت لسەر رزگارکرنا رەڤاندیێن ئێزدی و هەموو هەولان دەت بۆ ڤەگەراندنا وان.

دەقێ پەیاما سەرۆکێ هەرێمێ

جه‌ژنا جه‌مایێ ل هه‌مى خوشك و برایێن ئێزدى ل كوردستانێ و ل هه‌ر ده‌ره‌كا جیهانێ بن، پیرۆز دكه‌ین. هیڤیدارین ئه‌ڤ جه‌ژنه‌ بۆ هه‌میا ب خێر و خۆشى ڤه‌گه‌ڕیت و جه‌ژن و هه‌لكه‌فتێن بێن، د ره‌وشه‌كا باشتردا بۆ ئێزدییا و هه‌مى كوردستانییان بگشتى ڤه‌گه‌ڕن.

ئیسال ژى جه‌ژن د ده‌مه‌كێدا تێت كو هێشتا ب ده‌هان هزار خوشك و برایێن مه‌ یێن ئێزدى ژیانا ئاواره‌ییێ د كه‌مپاندا ده‌رباز دكه‌ن و نكارن ڤه‌گه‌ڕنه‌ سه‌ر مال و جهێت خۆ، بێترى سێ هزارا ژى هێشتا بێسه‌وشوینن‌ و چاره‌نڤیسێ وان نه‌دیاره‌.

ئه‌م جاره‌كا دى خوشك و برایێن خۆ یێن ئێزدى پشتڕاست دكه‌ین كو هه‌ر چ ژ مه‌ بێت دێ كه‌ین داكو ڤه‌گه‌ڕنه‌ سه‌ر مال و جهێن خۆ یێن ئارام و ئاڤه‌دانكرى و هندى ئێك ئێزدى وندا مایه‌، دێ هه‌مى هه‌ولا بۆ ڤه‌گه‌ڕاندنا وان ده‌ین.

دووباره‌ جه‌ما ل هه‌میا پیرۆز بیت، هه‌ر سال ب خێر و خۆشى.

نێچیرڤان بارزانى

سه‌رۆكێ هه‌رێما كوردستانێ

ب هەلکەفتا جەژنا جەمایێ سەرۆکایەتیا پەرلەمانێ کوردستانێ پەیامەکا پیرۆزباهیێ ئاراستەی ئێزدیان کر و تێدە هیڤی خواستن کو ئەڤ جەژنە ببیتە مایەیا خێر و خۆشیێ و رزگارکرنا رەڤاندیێن و ئاڤەدانکرنا ناڤچەیێن وان.

دەقێ پەیاما پەرلەمانێ کوردستانێ

ب ناڤێ پەرلەمانێ کوردستانێ ب هەلکەفتا جەژنا جەمایێ جوانترین پیرۆزباهیێ ئاراستەی بەرێز میرێ ئێزیدیان و جڤاتا رۆحانی و سەرجەم کوردێن ئێزیدی ل هەرێما کوردستان و عیراق و جیهانێ دکەین، جەژنا جەمایێ کو ل ٦ی ئۆکتۆبەرا هەموو سالەکێ دەستپێدکەت تا کو ۱۳ی ئۆکتۆبەرێ بەردەوام دبیت، ئۆمێدەوارین ببێتە جەژنا نوو بوونێ و خورتکرنا کولتورێ پێکڤەژیانێ ل هەرێمی کوردستان، ل سالێن دەربازبووی دا کوردێن ئێزیدی زوڵم وستەمەکا زۆر ل دەست داعش دا دیتن، هیڤیدارین ئەڤ جەژنە ببیتە مایەیا خێر و خۆشیێ و رزگارکرنا رەڤاندیێن وان و ئاڤەدانکرنا ناڤچەیێن وان، دووبارە پیرۆز بێت و هەر بمێنن ب خێر و خۆشی.

سەرۆکایەتیا پەرلەمانێ کوردستانێ

٥ ی ئۆکتۆبەری ٢٠١٩

قوباد تاڵەبانی جێگرێ سەرۆک وەزیرێن هەرێمێ برۆسکەکا پیرۆزباهیێ ئاراستەی ئێزدیان کر و دیارکر کو حکومەتا هەرێما کوردستانێ پابەندە ب پالپشتیكرن و كاركرنا بەردەوام بۆ کێمکرنا ئازارێن ئێزیدیان.

دەقێ پەیاما جێگرێ سەرۆک وەزیران

بەرێزان سەرجەم خوشك و برایێن ئێزیدی

هاتنا جەژنا (جەمایێ) ل هەموو خوشک و برایێن ئێزیدی ل سەرانسەری جیھانێ پیرۆز دکەم و ب هیڤی مە ئەڤ هەلکەفتە كو كۆمبوونا ئێزیدیان ل “لالش” پر بێت ل خۆشی و شادیێ و دەستپێکەک بێت بۆ سارێژ بوونی برینا ئەو مەرگەسات و كۆمەلکوژی و خەموژانانەیا ل سالێن بۆری دا هەڤبەری جڤاکێ ئێزیدیان بوویە ل شنگال و دەوروبەرێن نەینەوا.

حكومەتا هەرێما كوردستانێ پابەندە ب پالپشتیكرن و كاركرنا بەردەوام بۆ کێمکرنا ئازارێن ئێزیدیان ل سایا كوردستانەکا فرە رەنگ و تەبادا كو پێكڤە ژیانا ئاشتیانە و یەكتر قەبوولكرنێ سایە و سێبەر بێت.

ل گەل رێزدا

قوباد تاڵەبانی
جێگری سەرۆک وەزیران

زێدەتر ببینە

بابه‌تێن ب ڤێ مژارێ ڤه‌ گرێدای

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

دووماهی

Close
Back to top button
Close