نووچە

ب هەلکەفتا سالڤەگەرا (5)ێ ئا وەغەرکرنا نڤیسکار رێسان حەسەن پەرتووکەک لدۆر ژیان و بەرهەمێت وى ژئالیێ کورێ وی ڤە هاتە بەلاڤکرن

 

ئێزیدی 24 _ لەیت حسێن

رۆژا پێنج شەمبیێ رێکەفتی 28.11.2019، و ب هەلکەفتا سالڤەگەرا وەغەرکرنا نڤیسکار و پەروەردەکار رێسان حەسەن جندی، پەرتووکەک لدۆر ژیان و بەرهەمێت وى ژئالیێ کورێ وى (کۆڤان خانکى) ڤە ب ناڤونیشانێ ( رێسان حەسەن جندی ، چرایەک زوو ڤەمری) هاتە بەلاڤکرن و ل رۆژا ئینیا دەربازبووی ل رێ و رەسمەکی ژ هەژی دا و ب هاردبوونا کۆمەکا رەوشەنبیر و ئەدەب دۆست و کەسایەتی و چالاکڤان و مامۆستا و گەنجان ل هۆلا ئێکەتیا نڤیسەرێن کورد ل دهۆکێ هاتە ئیمزاکرن و بسەر هادربوویا دا هاتە بەلاڤکرن.

کۆڤان خانکی نڤیسەرێ پەرتووکێ ژ “ئێزیدی 24” را خوەیاکر، پشتی دەربازبوونا پێنج سالا لسەر وەغەرکرنا وی را من وەک کورێ رەحمەتی رێسان حەسەن جندی، پەرتووکەک لدۆر ژیانا وی بەرهەڤ کر کە وی بخوە ژی بەری 9 مەها ژ وەغەرکرنێ ژیانا خوە نڤیسی بوو لێ ب کورتی لۆما من ب فەر دیت کە ب درێژی ژیانا وی بەرهەڤ بکم.

دا زانین ژی، ئەڤ پەرتووک ژ (370) لاپەرێن قەبارە (A5) پێکهاتى یە و ل چاپخانا (نرگال) ل مووسل هاتیە وەشاندن و هەموو ئالیێن ژیانا نڤیسکارێ روحبەهشتى رێسان حەسەن، وەک: ( جڤاکى، خواندن، پەروەردە، رەوشەنبیرى، ئەدەبى، هۆنەرى، میدیاى و وەرزشى) هاتنە بەحسکرن، سەرەرایى پاشکۆیەکێ بەرفرەهـ ژ وێنە و بەلگەنامەیێن وى یێن فەرمى.

هەروەها گۆت، پەرتووکا ناڤبرى (پەیڤ، گۆتار، شیعر، بیرهاتن، تێکستێت ئەدەبى و برووسکێت بەهیداریێ) یێت رەحمەتی و یێت گرێدای وی ب خوەڤە دگرە.

ئاماژەکر، دەزگەهێ لینا ب کارێ چاپێ رابوویە، و ل نڤیسکار، خوەندەڤان و هەڤالێت روحبەهشتى رێسان حەسەن پیرۆزبە، براستی ژی ئەڤ سالڤەگەر ژى جارەک دن مە خەمگین و ب کۆڤان دکە.

هەروەها حەجی مەغسۆ یەک ژ نێزیکترین هەڤالێت ڤی نڤیسەری لدۆر گرنگیا ڤێ پەرتووکێ و ژیانا وی را ژ “ئێزیدی 24” را پەیڤت و گۆت، پشتی ماندیبوونەکا زۆر کاک کۆڤانی کورێ رەحمەتی رێسان حەسەن جندی کاری روودانێن گرنگ ل ژیانا بابێ خوە دا بەرهەڤ بکەت و ئەم ڤێ پێنگاڤێ ژی ب رۆناهیەک باش و رێزگرتنەک بۆ خەباتا رەحمەتی دبینن.

هەروەها گۆت، پشتی وەغەرکرنا مامۆستایێ رەحمەتی مە گەلەک پێ نەخوەشبوو کە هیچ ئالیەکی نەی رەوشەنبیری و نە حکومی خوە ل دەستخەت و بەرهەمێت ڤی نڤیسەرێ خەباتکەر نەکرە خوەدان.

دا زانین ژی، وەشان و بەرهەمێت وی، قۆناغێت ژیانا وی ژ قوتابخانێ و هەتا دەرچوونێ و کۆمەکا زۆرا شیان و بەهرەیێت وی ل بوارێت هۆنەری و راگەهاندنێ و چەند بابەتێت ب وی ڤە گرێدای ل پەرتووکێ دا خوەیاکرنە.

خوەیاکر، کە ئەڤ پەرتووکە کێمترین وەفاداری یە ژ کار و خەبات و خزمەتا مامۆستایێ رەحمەتی را ل درێژاهیا ژیانا وی دا کە ژبا کورێ وی ڤە هاتینە بەرهەڤکرن جارەک دی دەستخوەشیێ ل مامۆستا کۆڤان خانکی دکم و دبینم ژی کە هەر چ تشت ژ رەحمەتی را وەک رێزگرتن و دیاری بێتە کرن هەر کێمە ل هەمبەر خەمخوەری و خەباتا وی.

رێسان حەسەن جندی نڤیسکار و پەروەردەکارێ ئێزدی، ژ دایکبوویێ 5ی شوباتا 1961ێ یێ کۆمەلگەها خانکێ یە ل سنوورێ پارێزگەها دهۆکێ ل هەرێما کوردستانا عیراقێ، ل بوارێت (هۆنەری، ئەدەبی، رۆژنامەڤانیێ، رەوشەنبیری و پەروەردێ) دا خزمەت هەبوویە و کار و خەبات تێدە کریە، هەروەها یەکەمین سەرپەرشتێ پەروەردێ بابەتێ ئێزدیاتیێ بوو ل مێژوویێ دا و سەرپەرشتی و خودان ئیمتیازاتا هژمارەکا رۆژنامە و گۆڤاران ژی کریە و ل 28ی تشرینا دووێ ل سالا 2014ێ و ل عەمرێ 53 سالی دا چرایێ وی ژ قادا رەوشەنبیری و پەروەردێ و رۆژنامەڤانیێ ل ناڤ جڤاکا ئێزدی دا ڤەمری و وەغەرا خوە ب داوی کر.

زێدەتر ببینە

بابه‌تێن ب ڤێ مژارێ ڤه‌ گرێدای

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Back to top button
Close