گۆتار

رۆژی گرتن و عيدا رۆژيێن ئێزى

ئەلياس نەعمۆ خەتاری

ل دەمێ نێزيكبوونا رۆژيان هەموو خەلكێ ئێزدى بەرهەڤيا خۆ دكەن بۆ گرتنا رۆژيان وهاتنا جەژژنا رۆژيێن ئێزى ، ل هێره هەر مالەك ل هەر جهەكى يان ئەردەكى بت لدۆر حال ومالێ خۆ يێ ئابوورى و لدۆر عرف وعادات وداب ونەريتێن ئێزدياتيێ دێ كارێ خۆ كەت ، هەر ژ كەڤندا و وەكو دئايینێ مه يێ ئێزدياتيێ دا دئێته خوەياكرن رۆژى گرتن ئەركەكى فەره و فەرزەكه ژ فەرزێن حەقيقەتێ ، ژبەر ڤێ چەندێ دڤێت كەسێ ئێزدى ل هەر جهەكى ولسەر چ كارەكى بت رۆژيێن ئێزى بگرت وجەژنا خۆ برێڤەببەت ب ڤێ هەلكەفتا پیرۆز ، دێ ل هێره بەرێ خۆ دەينێ كا چاوا ئەڤ رێ و رەسم وجەژن ل سەردەمێ باب و كالا برێڤە دچۆن وكا بەهەڤيا خۆ چاوا دكرن وب چ شێوەى بوو ، ژيانا بەرێ گەلەك فەرق و جوداهى دگەل ژيانا ئيرۆ دا هەبوو لەوما بەرهەڤيا وان ب هەيڤەكێ تا بيست رۆژان پێش دەمێ رۆژيان خۆ حازردكرن ژوانه پەيداكرنا خەرجيێ ئانكو مەسرەفێ بۆ رۆژيا لەوما گەلەك خەلكێ دێ تشتەك فرۆتبان وەكى دەخل ودانى يان پەزا و جێلا ، هندەكا ل دوورى مالا خۆ كاردكرن دێ رابانه پاره بۆ وان فرێكربان يان ژى دێ ب ڤێ هەلكەفتێ مۆلەت ژ ئاغايێ خۆ وەرگرتبان وهاتبانه مال و جەژنا خۆ دگەل خێزانا خۆ دەربازكربان ، ل هێره هەر مالەكا ئێزدى دڤيان سەربرەك پەيداكربان چی ميهەك يان بەرخەك يان كاركەك وهندەكێن حال خۆش كۆلك حازردكرن بۆ رۆژيان بەرى رۆژيا ب نێزيكى هەيڤەكێ دێ سەربرا خۆ ل مال گرێدابا وخوارن وئاڤ دابانێ دگۆتنێ ( رەبيته ) و هەتا نوكه پتريا ئێزديان لسەر ڤی جۆرێ خۆ ئامادەكرنێ ماينه لێ هەتا هێڤاريا عيدێ پاشى دێ سەر ژێ كربا و ب خێرا رۆژيا كوشتبا ، بۆ پاشيڤ وفطار و رۆژا جەژنێ حازركربان و ژ وان حازريان پشتى سەربر كوشتبان سەر و بى دێ كزراندبان ئانكو دبستكيرادكرن ودكرنه د تەرونێ دا بسۆژن ودێ پاشى دناڤ نەهكا و دانقوتێ دا دكرنه دناڤ كلۆسكيدا ودكرنه د تەرونيدا دا پێکڤە هاتبانه كەلاندن وبۆ خوارنێ حارزبانه ، چێكرنا جزركا ئانكو دۆهنێ حەلاندى ژ وان سەربرا پەيدادكرن ودقەلاند و دكلۆسكادا هەلدگرت وپرتكێت گۆشتى ودۆهنێ پێکڤە مابان وهشكبان هەلدگرن دگۆتنێ جزرك و بۆ نيڤەكا كوتلكا وترشكا بكاردئينان ، هەر ديسان بيستى سەربرا (كەڤل) دهاتنه فرۆتن لێ دڤيا كەڤل یێ ساخلەمبا ونەهاتبا دراندن وبرينداركرن هەكه نەدهاته فرۆتن ، ديسان روفيك دگەل كەڤلى دفرۆتن بۆ ڤى كارى بكريت تايبەت هەبوون ل دەمێ رۆژيا دهاتنه گوندێن ئێزديان وكەڤل و روڤيك خرڤەدكرن ودكرين و پتريا وان ڤەلەبوون ژ گوندێن نێزيكێ ئێزديان بوون ، كا ل ڤان رۆژان دهاتنه خرڤەكرن كاب ئانكو هەستيێ جۆكا سەربرا و دهاتنه بكار ئينان بۆ ياريێن بەرێ ، دەنگێ باندانا ل فرۆتنا قەسبا و هژيرا و مێويژا لناڤ گوندى دەنگ ڤەدا وخەلكێ بۆ رۆژزيان دكرين جی ب دەخلى با يان بهيكا با يان ب بارا با ، ل دەمێ پاشيڤێ گەلەك مالا بەرێ پاشيڤێ بخۆن سفرەكه زادى حازردكرن و دبره دەر بۆ كەسێن فەقير و هندەك جينارا هەروەسا ل دەمێ فطارێ بڤى رەنگى خێرا خۆ دكرن ، لێ چاوا رادبوونه رۆژيا ل دەمێ بەرێ ئەندامێن خێزانێ یێت مەزن ل شەبەقێ تاريبووى دێ رابانه دەست و چاڤێت خۆ شۆشتبانه و دوعايا خۆ كربان و پێکڤە پاشيڤا خۆ خواربانه ، لێ بەرى دنيا زەلال با دێ كەسێ ئێزدى ب رۆژيبا ئانكو دەڤ كرتيبا هەتا ب رۆژئاڤا و بەرى دەمێ فتاربوونێ دێ زيارەتيبانه هەكە جۆبا بەرێ خاسا يان ل مالا خۆ ل خەليتكێ خەلات و بەراتا زيارتبا ل هێڤاريا عيدێ دێ هەر مالەكا ئێزدى سەوك باتبان ( نانێ عيدێ ) هەلبەت هەتا ئيرۆ رۆژ ئەڤ رێ و رەسمه دبەردەوامن ل ناڤ جڤاكێ مه یێ ئێزی ل هەموو ئێزديان پيرۆزبيت ئێزدى ، ل سبيەيكا عيدێ كوتلك ئانكو ترشك دئێنه چێكرن وخەلك دچنه بەر خاس وچاكا ودچنه عيدانا كەس وكارێن خۆ وجينار وهەڤالێن خۆ وڤێ عيدێ ل ئێك و دوو پيرۆزى دكەن ، خۆشى وجوانيا ڤێ عيدێ و هەموو عيدا ئەوه ل دەمێ زارۆك ب گومان لناڤ كۆلانێت گوندی دگەرين ومال بمال عيدا وان پيرۆزى دكەن وشريناهيا عيدێ خرڤەدكەن ، ب ڤى رەنگى عيد بدوماهيك دئێت لێ ژبەر كۆچبەريا ئيرۆ ئێزدى كۆچبەر بووين گەلەک خەلكێ مه دوور بوويه ژ ڤان رێ ورەسمێن پيرۆز و خۆش وجوان, و عيدا رۆژيێن.

زێدەتر ببینە

بابه‌تێن ب ڤێ مژارێ ڤه‌ گرێدای

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Back to top button
Close