ساخلەمیا دهۆکێ پلانا خوەیا نوو بۆ رێگریکرنێ ل ڤایرۆسێ کۆرۆنا راگەهاند

ئێزیدی 24 – دهۆك

رێڤه‌به‌ریا گشتی یا ساخله‌میا پارێزگه‌ها دهۆكێ ئیرۆ رۆژا شەمبیێ 21-03-2020، د کۆنگرەکی رۆژنامەڤانی دا ئامارا کەسێت هاتینە گەرەنتی کرن و پلانا خوەیا نوو بۆ رێگریکرنێ ل ڤایرۆسێ کۆرۆنا راگەهاند.

د نزار عسمه‌ت، رێڤه‌به‌رێ گشتی یێ ساخله‌میا پارێزگه‌ها دهۆكێ د کۆنگرەی دە خوەیاکر، پیرابوونێت ساخلەمیێ هاتینه‌ توندكرن ل دهۆكى پشتى یەکەم حاله‌تێ كۆرۆنایێ هاتیه‌ ده‌ستنیشانكرن وئه‌و پیرابوونێن نوو هاتینه‌ كرن دبه‌رژوه‌ندیا هه‌موو خه‌لكى دانه‌ و پێدڤی یە هەموو ئالیەک پێگیربە.

هەروەها زەلال کر، “هەتا نوهە 608 كه‌س هاتینه‌ گه‌ره‌نتیى كرن و نوهە 218 کەس ل گه‌ره‌نتینێ داینه‌ و 280 كه‌س پشكنین ژێ را هاتیه‌ كرن و 54 كه‌سێت كۆنتاك هه‌بوویه‌ هاتینه‌ بن چاڤكرن و پشكنینێت وان نیگەتیڤ بووینه‌ و هەر کەسەکی گومانلێکری بیت وێ ل بن چاڤدێریا پزیشکی دە مینت هەتا پشکنینێت وی دەردچن”.

دیسان ژی و ل هەمان کۆنگری دە، رێڤه‌به‌ریا گشتی یا ساخله‌میا پارێزگه‌ها دهۆكێ پلانا خوەیا نوو بۆ رێگریکرنێ ل بەلاڤبوونا ڤایرۆسێ کۆرۆنا ل سنوورێ وێ پارێزگەهێ و چاوانیا سەرەدەریکرنێ ب کەسێت گومانلێکری و توشبوویان رە راگەهاند، و پلانا وان ب ڤی ئاوایی یە:

1. نەخوەشخانا کۆرۆنا (نەخوەشخانا سۆتنێ) وێ بتنێ ژ چارەسەرکرنا نەخوەشێت کۆرۆنا رە بێ، دا تێکەلی چێنەبێ، و نابێ کەسەک سەرەدانا وێدەرێ بكە.

2. سەنتەرێ زانست ( هێلا بارزان_دهۆک)؛ خەلکێ شک یان گومان ل سەر هەی وێ ئێتە شاندن بۆ سەنتەری و ل وێدەرێ پشکنین وێ ژێ رە ئێتە کرن و چێدبێ بمینیە ل وێدەرێ هەتا چارەنڤیسێ وی بێتە خوەیاکرن (یان بۆ سەنتەرێ کۆرۆنا، یان نەخوەشخانەکا دیتر یان بۆ مال؛ ل گۆری ئەنجامێ پشکنینێ و حالەتا وی).

3. سەنتەرێ چارەسەریا کۆئەندامێ هەناسێ: ل رێڤەبەریا کاروبارێت خوەپاراستنا ساخلەمیا دهۆکێ (بەرامبەر سەرۆکاتیا زانکۆیا دهۆک)، دڤێت هەموو کەسێت سەرەدانا وان دەولەتێت کۆرۆنا لێ هەی یان باژێرێت دی یێت عیراق و كوردستانێ کە کۆرۆنا لێ هەبیتن، و هەتا نوهە 14 رۆژ ل سەر هاتنا وی نەچووین دڤێت سەرەدانا وی سەنتەری بکە ژبۆ دیتنا وی ژئالیێ تیمێت تایبەتمەندڤە.