داعش زاروەکە ئێزیدی لبەر فرۆتنێ دا دانیە بەرامبەر 20 هەزار دۆلاری، و مالا وێ داخوازا هاریکاریێ دکە
ئێزیدی 24 – دهۆک
پشتی بۆرینا نیزیکی شەش سالا ژ ڕەڤاندنا وێ و 21 کەسی ژ مالا وێ ،داعش زاروەکە ئێزیدی لبەر فرۆتنێ دە دانیە بەرامبەر 20 هەزار دۆلاری، و مالا وێ نکارێ ڤی دراڤی بدە و داخوازێ ژ جیێت بەرپرس و خێرخوازا دکە کە ب زووترین وەخت بێیە خەلاسکرن بەری جارەکە دی پەیوەندی ل نێڤا وان دە قوتببێ.
بابێ زارۆکا رەڤاندی ژ “ئێزیدی 24” رە گۆت،“ ل 3ـی تەباخا سالا 2014 و ل چاغێ کۆمکوژیا ئێزیدیا هاتی کرن ژبەر هێرشا داعش بۆ سەر شنگال، رێکخستنا دەولەتا ئیسلامی کەچا من و 21 نەفەری دی ژ مالا من ڕەڤاندن کە حەمرێ وێ 9 سال بوون و برنە هنەک دەڤەرێت نەناس کە ل بن دەستێ وان دە بوون و مە پەیوەندی ب وان رە نەبوو ئەڤ سەرێ چەند سالایە، وئەم ل هیڤیا خەبەرەکێ بوون ژ وان وئەم ژبەر ڕەڤاندنا وێ دنالین و نوهە ئەم دنالن ژ خەلاسکرن و زڤراندنا وێ”.
هەروسا گۆت،“ب رێیا تەلەفونەکێ خەبەر گەهشتە مە، و لبەر فرۆتنێ دە هاتە دانین و ئەم هەول ددن کە ئەم بینن، لێ ژبەر بەلەنگازیا مە، ئەم نکارن ڤێ یەکێ بکن و ئەڤ دەهـ رۆژن ئەم پەیوەندیێت گرێدای ب ڤی بابەتی ڤە دگرن، ئەم دترسن ئەم کەچا خوە ژ دەست بدن پشتێ ڤێ هەیامێ هەمووێ ژ بەر کە ئەم نکارن ڤی دراڤی بدن و بزەحمەتە بێیە کۆمکرن ژی ل ڤێ هەیاما کورت دە”.
و داخواز ژ خێرخوازا و هەموو جیێت کە گرنگیێ ب ڤان بابەتا ددن کر و گۆت،“ئەم هیڤی و داخوازێ ژ وان دکن کە هاریکاریا مە بکن،ئەم کەچا خوە جارەکە دی ژ دەست دن هەکە مە ئەڤ دراڤ ب زووترین وەخت کۆم نەکر”.