راپورتنووچە

کارێ گڤاشتنا زەیتوونا ل پەرستگەها لالش ب تالی هات

ئێزیدی 24 – نەسر حاجی

خلمەتکارێت ئێزیدی کارێ گڤاشتنا زەیتونا ل پەرستگەها لالش پشتی سێ رۆژا ب تالی ئانین، پشتی کە ژبەر قەدەغەیا هاتن و چوونێ ل هەرێما کوردستانێ ژ بەر بەلاڤبوونا ئیشا کۆرۆنا هاتبوو پاش ئێخستن.

خلمەتکار “عامر مەحموود سەیدۆ بەگ” کەیەک ژ وانێت کە پشکداری ل ڤی کاری دە کرین ل پەڤا خوە دە ژ “ئێزیدی 24” رە گۆت،“ب هیمەتا خلمەتکارێت خوەبەخش، و ب سەرپەرشتیا بابا چاویش و هادربوونا خلمەتکارا مە کارێ گڤاشتنا زەیتونا ب تالی ئانی”.

دا دیارکرن ژی،“کارێ گڤاشتنا زەیتونا بتریا جارا ل بەهارێ دەست پێدکە، لێ ئیسال هاتە پاش ئێخستن ژبەر رەوشا کۆرۆنا و سەپاندنا قەدەغەیا هاتن و چوونێ ل عراقێ و هەرێما کوردستانێ”.

زەلال کر ژی،“ژبەر ڤەنەکرنا رێیا نێڤبەرا پارێزگەهێت هەرێما کوردستانێ و پارێزگەهێت دی، خلمەتکارێت خوەبەخشێت ژ بەعشیقا و بەحزانێ و شنگال نکاری بوو ئیسال پشکداریێ ل گڤاشتنا زەیتونا دە بکن”.

گۆت ژی،“خەلکێ بەعشیقا و بەحزانێ بتر ب کارێ بوستانێ زەیتونا زانن و شەهرەزاترن ل گڤاشتنا زەیتونا دە”.

و ل دۆر وان کەسێت کە پشکدار بووین گۆت،“بتریا ئەو خلمەتکارێت هادربووین خوەبەخشێت ژ گوند و کۆمەلگەهێت ئێزیدیا ل شێخان و تلکێف بوون”.

خلمەتکار “خالد مەحموود هوێری” ژی یەک ژ ئەوێت کە پشکداربووین ژ “ئێزیدی 24” رە پەیفت و گۆت،“پەرستگەها لالش چەند پاشکەفت هەینە و یەک ژ وان ژی بوستانێ زەیتوونا یە کە نێزیکی 750 داری زەیتوونا تێدایە”. و گۆت ژی کە “بتریا جارا زەیتوون ل کانوونا یەکێ تێنە چنین و تێنە عمبارکرن هەتا مەها نیسانێ دا بێنە گڤاشتن”.

دیسانێ گۆت،“ئەڤ زەیت تێە بکارئینان دا چرا و فەتیل ل پەرستگەها لالش ل هەر چارشەم و هەر ئینی پێ بێنە هلکرن، و هەروسا ل ئیڤارێت عیدا و عەرەفاتا و تایبەت عیدا سەرێ سالا ئێزیدیا”.

پەرستگەها لالش، جیێ هەری پیرۆزترە لبا ئێزیدیا ل عراقێ و دنیایێ و دکەڤیە نێڤا سێ چایا ل دەڤەرا شێخان کە دکەڤیە باکورێ رۆژئاڤایێ باژارێ مووسل و گڤاشتنا زەیتوونا یەکە ژ رێ و رسمێت دینی یێت پیرۆزە لبا ئێزیدیا و تێدا زەیت تێتە کارکرن دا 366 فەتیل تێدە بێنە ڤیێخستن ئانکو ب ژمارا رۆژێت سالێ.

زێدەتر ببینە

بابه‌تێن ب ڤێ مژارێ ڤه‌ گرێدای

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Back to top button
Close