كوردستاننووچە

دەهـ سال بسەر دەرکەتنا یەکەمین گۆڤارا سەربەخوەیا ئێزیدیناسیێ رە دەرباس دبن

ئێزیدی 24 – لەیت حسێن

ل 10ی حوزەیرانا سالا 2010ێ، یەکەمین گۆڤارا سەربەخوەیا ئێزیدیناسیێ دەست ب کارێ خوە کر و ب ڤێ یەکێ ژی 10 سال بسەر دامەزراندنا ڤێ گۆڤارێ رە دەربازدبن، کە ژ هنگێ دە و هەتا نوهە کارینا 14 هژماران ژ ڤێ گۆڤارێ دەربینن و ئەرکێ خوەیاکرنا ئۆل، کەلتور و فلکلۆرێ ئێزیدیان ب ملێ خوەڤە گرتینە.

“کۆڤان خانکی” سەرنڤسیەرێ گۆڤارا مەحفەل ژ “ئێزیدی 24” رە خوەیاکر،“گۆڤارا مەحفەل، یەکەمین گۆڤارا سەربەخوەیا ئێزیدیناسیێ یە، خەرجیێ و تێچوویێ وێ ژئالیێ ستافێ وێڤە تێتە دابینکرن، ب زمانێ کوردى (ب پیتێت ئارامى و لاتینى) و زمانێ عەرەبى و ئینگلیزى ل دهۆک دەردکەڤە”.

ناڤهاتی دیسا گۆت،“ل پێشیێ مە گۆڤار تنێ ب هەردوو زمانێت کوردی و عەرەبی دەرتێخست لێ ئەڤ هەیاما چەند مەهایە و ژبەر خوەیاکرنا تشتێ گرێدای ئێزیدیان ژ هەموو خەلکێ رە ئەم ب زمانێ ئینگلیزی ژی نوهە بابەتان تێدە بەلاڤ دکن”.

هەروەها خوەیاکر،“ستافێ گۆڤارێ ژى ب ڤى ئاوای یە: رێسان حەسەن/ خودانێ ئیمتیازێ، کۆڤان خانکى/ سەرنڤیسکار، پشکا کوردى: مەروان شێخ حەسەن رەشکانى، عەلى جۆقى، ئەلیاس نەعمۆ خەتارى. پشکا عەرەبى: حەجى مەغسۆ حەسۆ، ئەرشەد حەمەد، مستۆ ئەلیاس دنایى. پتریا وان کەسانێت ئەکادیمینە”.

دا زانین ژی کە، رێسان حەسەن، ل پێشیا سالا 2010 دڤیا گۆڤارەکا رەوشەنبیرى یا سەربەخوە و وەرزانە تایبەت ب ئێزیدیان ڤە دەربئێخە کە نە گرێدایى چ ئالیان بە و ئارمانجا وێ خزمەتکرنا ئۆل و کەلتور و فلکلۆرێ ئێزیدیان بە و هەموو بابەتان د ناڤ خوە دا هەمبێز بکەت ب تنێ دوورى سیاسەتێ بت، ل دەستپیکێ دڤیا گۆڤارەکا مالباتى بت، پاشى ئەو هزر هاتە بەرفرەهکرن، ل رۆژا (9/6/2010) مە داخوازنامەک نڤیسى و ب فەرمى داخوازا مۆلەتێ ژ سەندیکا رۆژنامەنڤیسێت کوردستانێ – هەولێر کر، ئەو بوو ل رۆژا پاشتر رازەمەندى ژ وەشاندنا (گۆڤارا مەحفەل) رە هاتە دان.

هەروەها گۆت،“ژ وێ رۆژێ و هەتا نوهە ب سەرفرازى دەهـ سال د سەر ژیێ وێ رە دەرباز بوون و مە کارى پەیاما وێ بپارێزن”.

پتر زەلال کر،“یەکەمین هژمار ژ گۆڤارا مەحفەل ل هاڤینا (2010ێ) دەرکەت و بەردەوام بوو هەتا تەباخا 2014، دڤێ هەیامێ دە مە کارى (9) هژماران ژێ دەربئێخن، پشتى هاتنا داعش و پەیدابوونا رەوشەکا ئاورتە ل باشوورێ کوردستانێ و دەڤەرێ، پتریا رۆژنامە و گۆڤاران هاتن سەکناندن، مەحفەل ژى یەک ژ وان بوو”.

سەرنڤسیەرێ گۆڤارا مەحفەل بتر گۆت،“ل رێکەفتی (25\7\2018) ستافێ مەحفەل ل دهۆکێ ل هەڤ کۆمبوو و بریارا دووبارە وەشاندنا وێ دان و هەتا رۆژا ئیرۆ کارینە (14) هژماران بوەشینن، د ڤان هژماران دا، ب دەهان نڤیسکارێت هێژا ل خوە کۆمکرینە، ب هەزاران خوەندەڤان پەیداکرینە، هەر د ڤان چاردە هژماران دا (260) گۆتار و ڤەکۆلین هاتنە وەشاندن”.

ل تالیێ ژی گۆت،“ب ڤێ هەلکەفتێ پیرۆزباهیێت خوە ئاراستەیى نڤیسکار و خوەندەڤانێت گۆڤارا مەحفەل دکن، ب وە سەربلندن، شوون تلیێت وە د مەحفەل دا د خوەیاینە، هەر سەرکەفتى و سەرفراز بن، ب مەرە دبەردەوام بن، مەحفەل بەردەوامە”.

زێدەتر ببینە

بابه‌تێن ب ڤێ مژارێ ڤه‌ گرێدای

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Back to top button
Close