گۆتار

دا ئەم سۆپاسی و پێزانینێن خۆ ئاراستەی خەلكێ دهۆك و زاخۆ بكەین

پیر هەڤال باعەدری

سەبارەت پرۆسا ڤەگەراندنا ئاواران دئەڤێ قۆناغا سەخت و نالەبار دا و ب تایبەتی ئاوارەیێن نها ل سنوورێ پارێزگەها دهۆكێ، ئەڤێن دناڤ كەمپان و ژ دەرڤەی كەمپان دا نیشتەجێ و ڤەگەراندنا ئەوان بۆ سەر جهـ و وارێن ئەوان ل هەر جهەكی هاتین، ب تایبەتی خەلكێ شنگالێ، ژبەركو شنگال كوردستانی بوو ل وێدەرێ كوردان دەسهەلات دگێران ژلایێ حكومی ڤە چەند فەرماندە و دام و دەزگەهێن میری و رێڤەبەری لێ هەبوون و ژ لایێ كلتۆری و مێژوویی ڤە بەحسێ ڕەسەنایەتی یە چیایێ هێژیرا و تووتنێ و بەرخودانێ دناڤ كرینە و هاتیە گۆتن د هەلبەست و سترانان دا.

هەروەسا ژلایێ حزبی ڤە، هەمی پارت و لایەنێن سیاسی یێن كوردستانی ب تایبەتی پارتی دیموكراتی كوردستان و یەكێتی نیشتمانی كوردستان خودان چەند دەزگەهێن حزبی بوون و بارەگایێن رێكخستن و جەماوەری هەبوون، بەس پارتی دیموكراتی كوردستان ژ هەمی لایەكی ڤە خودان دەستهەلات بوو و هێزیێن خۆ یێن لەشكەری و ئەمنی جێگیر كربوون و تاك لایەنە بریار و سەرەدەری دگەل خەلكێ شنگالێ ئەنجام دان و هەروەسا شنگال عیراقی بوو ژی، چونكی ژ لایێ ئیداری ڤە ب سەر حكومەتا عیراقێ ڤەبوو و پشتی تێكچوونا پەیوەندیێن لایەنێن سیاسی یێن عیراقێ و كوردستانێ ب تایبەتی پەیوەندیێن كەسایەتی و ناكوكی و ململانیێن دناڤبەرا پارتی دیموكراتی كوردستان و (حزب الدعوة) یا ب سەرۆكاتیا (نوری مالكی) و هاتنا رێكخراوا تیرۆریستی یا داعش و داگیركرنا دەڤەرێن كێشێن سیاسی ل سەر، ئانكو دەڤەرێن ڤەقەتیایی یان سنورێ ماددەیا 140 ب تایبەتی سنوورێ قەزا شنگالێ ب تەمامەتی ب هەمی لایەكی ڤە كەفتە دبن دەسهەلاتداریا ئەڤێ رێكخراوا تیرۆریستی یا بناڤێ داعش و د دەمەكی كورت دا ژی.

‏ ئەڤێ رێكخراوا تیرۆریستی كۆمكوژی ئەنجام دان، ئێزدی یێن شنگالێ بوونە قوربانیێن سەرەكی د ئەڤێ هاوكێشێ دا و بازرگانی ب خوین و شەرەف و ئاخا ئێزدیان هاتە كرن و پشتی ئەڤێ قوناغێ چەند گۆرانكاریێن بلەز لپێ خۆ ئینان و راگەهاندنا بەرنامێ ئابووری یە سەربەخۆ ژلایێ حكومەتا هەرێما كوردستانێ ڤە و ئەنجام دانا ریفراندۆمێ و شكەستنا وێ ریفراندۆمێ، كارڤەدانێن ناڤخۆیی و دەرەكی یێن ئەڤێ ریفراندۆما شوم لپێ خۆ ئینان.

ل 16ی ئۆكتۆبەرێ ل سالا 2017 ، شنگال جارەكا دی ب تەمامەتیی كەفتە د بن دەسهەلاتداری هێزیێن عیراقێ لەورا پێتڤی بوو لسەر حكومەتا هەرێما كوردستانێ و حكومەتا عیراقا فیدرال دگەل رێكخراوێن حكومی و نا حكومی و رێكخراوێن ژ دەرڤە، ئەڤ پرۆسا هەنێ برێك و پێكی و ب بەرنامە و پلان هاتبان رێكخستن و ئەنجام دان، نەك بشێوەكی بەرەلا و عشوائی ژبەركو ئەگەر ئەم بەرێ خۆ بدەینێ، حكومەتا هەرێما كوردستانێ ئەڤ ئاوارەیێن هەنێ وەك كارتەكا فشارێ د ئەڤان هەلومەرجێن نها دا بكار دئینا، ئەڤ كارتە هاتە سۆتن و هندەك هاوكێشێن نوو و رێكەفتنێن نوو یێن پێش وەخت كو گرێدای سیاسەتا نێڤ دەولەتی ل سنۆرێ دەڤەرێ سەرهەلدان، ب تایبەتی لسەر سنوور و دناڤ سنوور یێ هەر دوو ئالیا ناكوكی و كێشە و ئالۆزی و ململانیێن سیاسی و ئابووری و كێشێن دەستووری و كێشێن هاتنا هێزیێن توركیایە و لێدانا ئەوان ب ھێجەتا هەبوونا هێزیێن پەكەكەی و یەپەكێ ل ئەڤان دەڤەرێن ل سەر سنووری، لێ مخابن ئەڤ یەكە دورست نینە، پەكەكە ب ئاشكرایی ڕاگەهاندن وەرن ئەم یێن ل ڤر.

ئەڤە ل دەمەكی دا كو رۆژانە فرۆكێن توركیا سنوورێ پارێزگەها دهۆك بوردومان دكەت و هەمی د بێ دەنگن لسەر ئەڤێ یەكێ و هاتنا هێزیێن توركیا ب بەرنامە و پلانێن توكمەیە و هەروەسا پشتگیریا ئەمریكا و هەلكرنا گلۆپا كەسك بۆ توركیا ب رێكەفتن و نهێنی ل پشت پەردێ دناڤبەرا هەر دوو ئالیا دا هاتنە ئەنجام دان و ئەڤە پرۆژەیەكی نێڤ دەولەتی یە.

ئەگەر بەرێ خۆ بدینە لاپەرێن مێژوویێ و ڤەكۆلینێ لسەر بكەین، دێ دیار و ئاشكرا بیت ئەڤ یەكە و دێ مەترسیێن ئەڤێ چەندێ ژی ئاشكرا بن، ئەگەر بەحسێ قۆناغا نها یا عیراقێ بكەین دەربارەی گۆرانكاریێن هەنوكەیی یا دیار و ئاشكرایە عیراق خودان پێگەهێ سیادەیی یە و خودان ئالایە و سنوورەك هەیە و خەلكێ وێ تێدا دژیت، لسەر ئاستێ نێڤ دەولەتی و ئەگەر ئەم بەرێ خۆ بدینێ لسەر ئاستێ ناڤخۆی، دێ كومەلەكا كێشە و قەیران و ئالۆزی و ململانیێن سیاسی و ئیداری و مەزهەبی هەنە، بەلێ چارەسەری دێ بۆ ئەڤان هەبیت هەروەسا لاوازكرنا عیراقێ ژی ئەڤ یەكە بوون بەس پشتی هاتنا قوناغا كۆرۆنا و ژبەر هندێ هندەك رێگری هەبوون بەس هیڤی و ئۆمێدەكا گەش و روون بۆ عیراقیا و عیراقستانێ زڤرینن، ئەو ژی پشتی تێكچوونا پەیوەندیێن لایەنێن سیاسی و خەلك و جەماوەری و دەستپێكرنا قوناغا خۆپیشاندانا و بدوماهیك هاتنا ئەوان خۆپیشاندانا و گوهورین و چاكسازی د هەمی بیاڤ و سیستەمێ حكومداریێ دا لادانە.

‏سەرۆك وەزیرێ حكومەتا عیراقا فیدرال و دانانا بەرێز موستەفا كازمی وەك سەرۆك وەزیرێ حكومەتا نوو یا عیراقێ دەست بكاربوویە، ناڤبری ئومێدەكا دی دا عیراقێ و شیا عیراقێ لسەر پێن خۆ بهێلیت و رۆژ بۆ رۆژێ پێنگاڤ و قۆناغێن باش و باشتر د هاڤێتن و بەرنامێ وی یێ چاكسازیێ ژی یێ بەردەوامە و دەست پێكریە و گەلەك قۆناغێن سەخت و دژوار ویێت برین و دهێتە پێشبینی كرن كو موستەفا كازمی كاندیدێ ئەمریكا بیت و گلۆپا كەسك بورا هلكربیت، ب هەمی لایەكی ڤە پشتگیری و سەركەفتنا ناڤبری بكەت و بهێتە كرن ژبەر ئەوان دەستێن دەرەكی یێن دناڤ كاروباریێن حكومەتا عیراقێ دا هەمیان ببریت، ب تایبەتی دەستێ ئیرانێ و هەروەسا مەرجێن عیراقێ زێدە كرینە دگەڵ شاندێ حكومەتا هەرێما كوردستانێ داكو سنوورێ هەرێمێ دگەل توركیا ژی بكەفتە دەستێ عیراقێ و ئەوان زێدە گاڤیێن توركیا ببریت.

لەورا یا من دڤێت ئەز بێژم، پشتی بورینا شەش سالان لسەر مال وێرانیێ و دەربەدەریێ و بناڤێ ئاوارەییێ دناڤ خیڤەت و چادران دا ل كەمپا ژین و ژیانا خۆ برێڤە دبین ب خۆشی و نەخۆشی ب دلەكی شكستی و تژی خەم و كوڤان و برین و ب چاڤێن تژی روندكێن زەلال، ب غەریبیەكا بێ سنووری و ب ژ دەست دانا هەزاران كچ و ژن و دایك و زارۆكێن باب و باپیران وێران كرنا مال گوند و كۆمەلگەها و باژێرێ ئەوان و هەردیسان ئەڤ ڤەگەراندنا ئەوان ژی خەم و برین مەزنتر دبن و ل بیرا ئەوان دهێتە ڤە، دەمێ مەزنترین رێكخراوا توندڕەوە تیرۆریستی یا داعش یا ئەو كۆمكوژی دژی خەلكێ شنگالێ ئەنجام دای و كەس بێ بەهر نە كری ژ ئەوێ نەهامەتیێ و دەردەسەریێ و قوربانیدانێ ژبۆ ئاخ و وەلات و زمان و ئۆل و ئیمان و كلتور و ناسنامە مرۆڤایەتیێ، لێ خەلكێ مە هەر خۆ بێ هیڤی نەكر و جارەكا دی و پتر ژ جاران دەست ب ئاڤاكرنا مەزارگەهێن خۆ یێن ئۆلی و ئاینی یێن پیرۆز كرن و جهـ و وارێن خۆ ئاڤاكرنە ڤە و دەست ب ژیانێ كرن و لاپەرەكی نوو یێ پڕ هیڤی و ئومێدێن گەش لێ مخابن و سەد جار مخابن، ئەڤ هەول و بزاڤ و بیر و باوەری و كلتور و ناسنامە و رەسەنایەتی یا ئێزدیان ل ئێزدیخانێ بێ گرەنتی كرن و بێ خودانی پێڤە دیارە، بتنێ ئەڤ یەكە هەول و بزاڤێن تاكە كەسی یێن جڤاكێ ئێزدیان، د هەمی قۆناغیێن بوری دا و د ئەڤێ قۆناغێ ژی دا، دێ وەسا بیت.

ژبەر بێ خودانیا ئێزدیان و نەبوونا رێبەرەکی بووینە وەك پەزەكی بێ خودان لەورا هیڤی یە بۆ ئەڤێ قۆناغێ و قۆناغا بهێت گەلێ مە یێ ئێزدی ب تایبەتی خەلكێ شنگالێ یەك بگرن و یەك دەست بن، ئێدی بلا ژین و ژیانا وە ب بەرنامە و پلانێن ئستراتیجی بن، داكو ل پاشەرۆژێ ب هیڤی و ئومێدیێن خۆ و گەلێ خۆ بگەهیننە ئارمانجا بێی ببنە قۆربانیێن كەسەكی دی تر و دیسان دەربەدەر و ئاوارە نە بینە ڤە.

دا ل ڤێرێ سوپاسی و پێزانینێن خۆ ئاراستەی خەلكێ بادینان ب گشتی بكەین و خەلكێ دهۆكێ و زاخۆ ب تایبەتی بكەین دنیایەكا سۆپاسی و پێزانینێنا بۆ هەوە هەمیان، هەی خەلكێ شەرەف مەندێ سەر بلند و خودان غیرەت و كەرامەت لسەر دەمێ فەرمانا حەفتی و چارێ هەوە دەستێ هاریكاریێ بۆ خەلكێ مە بگشتی درێژ كر و هەوە دەرگەهێن خانی و وار و مزگەفتێن خۆ بۆ مە ڤەكرن و ئەو نان و ئاڤا هەوە دایە مە و زارۆكێن مە خودایێ مەزن ژ هەوە هەمیان رازی بیت، خودێ خێر و خلمەتێن هەوە هەمیان قەبوول بكەت، دووبارە سۆپاس بۆ ئەڤی هەلویستێ هەوە یێ جوامێرانە و دلێرانە و مەردانە و شێرانە .

زێدەتر ببینە

بابه‌تێن ب ڤێ مژارێ ڤه‌ گرێدای

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Back to top button
Close