ژنەکا ئێزیدی ژ کەمپا هۆلێ ل سوریا هاتە خەلاسکرن

ئێزیدی 24 ــ لەیت حسێن

دەرەنگیا ئێڤارا دووشەمێ 13 تەموزا 2020ێ، خەلاسبوونا ژنەکا ئێزیدی بناڤێ (س. ق. ج) ژ کەمپا هۆلێ ل دەولەتا سوریا ئا کە مالێت ئەندامێت داعش یێت تیرۆری تێدە دئاکنجینە هاتە راگەهاندن.

هەڤژینێ ڤێ ژنێ ژ “ئێزیدی 24″ رە پەیڤی و گۆت، کە ” پشتی کارەکی ب زەحمەت و درێژ هەڤژینا وی هاتە خەلاس کرن ئەوژی ب هیمەتا خودێ و سوپاس ژ هەر یەکی هاریکاربووی ب مەرە”.

ژ “ئێزیدی 24″ رە ئاشکەرا ژی کر، کە” هەڤژینا وی عەمرێ وێ 27 سالن و داکا سێ زارۆکایە و دوو ژ زارۆکێت مە خەلاسبووینە و کێرتێ یێ دی ب وێ رە بێ”.

هەروەها زەلال کر، ” ئەو ب 22 کەسێت دی ژ مالباتا خوە رە ل کۆمەلگەھا تل بنات ل قبلەتی چایێ شنگالێ ل وەختێ هێرشا رێکخستنا دەولەتا ئیسلامیا داعش بسەر شنگالێ و دەڤەرێت بسەرڤە دە هاتنە رەڤاندن و هەتا نهوە چارەنڤیسێ 16 کەسان ژ وان ل دەستێ ئەندامێت ڤێ رێکخستنێ دە خوەیا نینە”.

لگۆری تالی ئامارا نڤیسینگەها رزگارکرنا رەڤاندیێت ئێزیدی ل پارێزگەها دهۆکێ، هەتا نهوە 3530 کەس هاتینە خەلاس کرن و چارەنڤیسێ 2887 کەسێت دی خوەیا نینە ئەوژی ژ وەختێ هێرشا ئەندامێت رێکخستنا تیرۆرستیا داعش لسەر ئێزیدیان ل قەزا شنگالێ ل رۆژئاڤایێ پارێزگەها نەینەوا.