راپورتنووچە

کۆمەلگەها گرزەرک، ب سەر قوربانیدان و رزگارکرنا وێ دە هیژ ژ خەلکێ ڤالایە

ئێزیدی 24 ــ خەلیل پوکۆ

پشتی شەش سالا ژ ئاوارەیێ ل هەرێما کوردستانێ، ئەڤە هەیاما سێ هەیڤایە ئاوارێت ئێزیدی ڤەدگەرنە مالێت خوە، و ژ هەیڤا حزێرانا چووی دە خەلک ڤەگەریایە پتریا گوند و کۆمەلگەهێت شنگال.

کۆمەلگەها گرزەرک یا کە ل سبەها رۆژا یەک شەمێ 3 تەباخا 2014ێ راستی هێرشەکا گران بووی ژ با رێکخستنا تیرۆرستیا “داعش” و کورێت ڤێ کۆمەلگەهێ ل بەر ئەندامێت رێکخستنێ ب سەعەتێت درێژ سەکنین هەتا نەخەرێت تالی، ل وەختەکی دە کە داعش هێز و قەوەت ژ گوندێت عەرەبا یێت دەردۆر وەردگرت، داعشێ چەپەرێ پێشی شکێناند و ئەو جانگۆریێت کورێت کۆمەلگەهێ یێت کە ماین و شەر دکرن کوشتن و ئەو کەسێت نکارین بگەهنە چیا ژی رەڤاندن، و بتریا وان ژی ژن و زارۆک بوون.

پشتی چەند دەمژمێران ژ کۆنترۆلکرنا کۆمەلگەهێ ژئالیێ داعشێ ڤە 130 کەس هاتنە رەڤاندن و نێزیکی 25 جانگۆریێت کە شەر دکرن ل دژی وان کوشتن و 6 کەسێت دی ژی ل ئەنجامێ تەقە و بۆردومانا هەرەمکی ل سەر کەسێت سڤیل و قورتالبوویێت کۆمەلگەهێ هەر ژ با داعش ڤە هاتنە کوشتن کە ئەو ژی کالەمێر و زارۆ بوون.

ل سەر سەدەما نە ڤەگەریانا خەلکێ کۆمەلگەهێ “دەخیل سەبری” ژ “ئێزیدی 24” رە پەیڤی و گۆت،“سەدەما نە ڤەگەریانا خەلکێ بۆ ڤێ کۆمەلگەهێ وێرانکرنا کە داعش ل تال خوەڤە هێلایی ل وەختێ شەر دە، و هەتا نوهە کۆمەلگەهـ نا ئامنە ژبەر پاشڤەمایێت شەر و تەقین و مالێت بۆمبە کری”.

زێدەتر گۆت،“تەعدەیا گەهشتینە مالا ژبەر بارانێ و لەهیا ژی براستی دبنە سەدەما نە ڤەگەریانێ، ژبەر ئەڤ تشت دبە ئەگەرا خەراکرنا مالێت ئاخی و تایبەت ئەڤ کۆمەلگەهە خەلکێ بەلەنگازی تێدە بوو”.

کۆمەلگەها گرزەرک، سەر ب ناحیا گرعزێر ڤەیە کە ئیداری بسەر قەزا بەعاج ڤەیە ل رۆژئاڤایێ پارێزگەها نەینەوا، و ژ سالا 1973ێ ڤە وەختێ کە ئێزیدی ب زۆرێ ژ با رژێما به‌عس ڤە ژ گوندێت چیای یێت دەردۆرێت شنگالێ هاتنە کۆچکرن و ل کۆمەلگەھا ئاکنجی بوون نێزیکی 700 مالێت ئێزیدی و موسلمان تێدە بوو و بتریا وان ژی ئێزیدی بوون.

و “سەبری” ئاماژە ب وێ یەکێ ژی کر، کە“خەلکێ ڤێ کۆمەلگەهێ د بەلەنگازن و ئەو نکارن ژبا خوە مالێت خوە ئاڤاکن لۆما ئەڤ ژی دبە رێگر ل بەردەم ڤەگەریانا خەلکێ کۆمەلگەهێ ئەڤ ژی سەرباری رەوشا ئەمنیا ل ور و جهێ ڤێ کۆمەلگەهێ یێ جوگرافی”.

هەروەها زەلال کر، کە “چارەسەریا کێشا ڤەگەریانا خەلکێ کۆمەلگەهێ ئەوە کە بێنە قەرەبوکرن ژئالیێ ماددی ڤە و ئەڤ کۆمەلگەهە ژ پاشڤەمایێت داعش ژبا تیمێت هەندەسی ڤە بێتە پاقژکرن و خزمەتگوزاری بێنە دابینکرن”.

و “عەلی میرزا” کە یەک ژ وانێت کە ل کۆمەلگەھا گرزەرک شەر ل دژی داعش کری ل 3 تەباخا 2014ێ، ژ “ئێزیدی 24″ رە گۆت،“پشتی ئەم ب ئەرکێ خوە رابووین ل سبەها رۆژا یەک شەمێ 3 تەباخا 2014ێ ئەم ل دژی داعش سەکنین و مە شەر کری و مە کاری ئەم خەلکێ چەند سەعەتێت درێژ ب پارێزن و مە گەلەک ژ داعش کوشتین، بەلێ پشتی وان کۆمەلگەهـ کۆنترۆلکری ئەو رابوون ب بۆمبە کرنا کۆمەلگەهێ ب ئاوایەکی هەرەمکی و براستی شەرێ نێڤ مە و وان ژی دە چێبووی بووە سەدەما گەهاندنا تەعدەیێ ب هنەک جها”.

تێتە زانین ژی کە پشتی کۆنترۆلکرنا “داعش” لسەر کۆمەلگەهێ ب سێ سالان، ل 30-05-2017 حەشدا شەعبی کاری ڤێ کۆمەلگەهێ رزگاربکە ئەوژی پشتی شەرەکی دژوار ب رێکخستنێ رە.

و پشتی رزگارکرنێ تیما عەسکەری ئا هەندەسی زەحمەتیا پاقژکرنا کۆمەلگەهێ راگەهاند، و دوپاتکر کە رێکخستن رابوویە ب بۆمبەکرنا گەلەک مالان، و ل رێکەفتی 07-12-2019 هێزێت ئەمنی کوشتنا دوو ئەفسەران و سەربازەکی ل ئەنجامێ پاقژکرنا مالەکێ ژ ڤێ کۆمەلگەهێ راگەهاند.

“میرزا” ئاماژە ب وێ یەکێ ژی کر، ” ب زەحمەتە ئەم ڤەگەرینە کۆمەلگەهێ ب سەدەما پاشڤەمایێت شەر و بۆمبێت چاندی و مالێت وێرانبووی، کۆمەلگەهـ پێدڤی ب هەلویستەکی باشە ژبا حکومەتێ و رێکخراوا ڤەیە دا بۆمبە راکن و خەلکێ قەرەبووکن دا خەلک کاربێ ڤەگەریێ و دیسا ژیانێ ل کۆمەلگەھا خوە ڤەگێرن”.

تێتە زانین کە پەرلەمانێ عراقێ ل سالا 2016ێ شنگال وەک باژارەکی وێران و فەرمان ب سەری هاتی دیارکر و پشتی دوو سالا، ل 13 کانوونا یەکێ سالا 2018ێ ویلایەتێت یەکگرتی یێت ئەمریکا ب ئاوایەکی فەرمی دانپێدان ب کۆمکوژیا ئێزیدیان کر وەک جینۆساید ئەو ژی ل رێ و رەسمێ پرۆژە بریارا “HR390” یێ کە سەرۆکێ ئەمریکی، دۆنالد ترەمپ ل کۆچکا سپی ئیمزا کری.

زێدەتر ببینە

بابه‌تێن ب ڤێ مژارێ ڤه‌ گرێدای

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Back to top button
Close