گۆتار

نامەیەکا ڤەکری بۆ برایێن موسلمان ل دەڤەرا بادینان

جەعفەر سمۆ

 

ئێزدی وەکو پێکهاتەکی رەسەن ژ گەلێ کوردستانێ خۆدان دیرۆکەک کەڤنارن ل ڤی وەلاتی ، و ددرێژاهیا دیرۆکێ دا تووشی زولم و ستەمەکا مەزن بوینە، چونکی بیرو باوەرێن خۆ ب زمانێ کوردی پاراستی نە.

د راستی ژی دا ئێزدیان هەست ب هەبونا خۆ کرینە پشتی شۆرەشێن کوردی سەرهلداین ب تایبەت ژی ل نیڤا دووێ ژ چەرخێ بۆری و هێرڤە ، لەوا ژی پشکداریەکا کارا دشۆرەشێن کوردیدا کرن ، پشتەڤانی و هاریکاریا برایێن موسلمان ژی ب تایبەت ل بادینان ژبۆ ئێزدیان ژ دیرۆکا مە بەری نها دیارکری جهێ رێزگرتنێ بوو ، لەوا ژی پرانیا ئێزدیان ل وان جهان هاتینە پاراستن یێن کو ل نێزیکی دەڤەرا بادینان.

ل ڤێ داویێ ب تایبەت پشتی جینۆساێدا ئێزدیان ل سالا 2014 سایکۆلۆژیەتا تاکێ ئێزدی هاتە شکاتن لەوا ژی بەردەوام جەنابێ سەرۆکی دگۆتارێن خۆدا دوپات دکەت کو پێتڤی یە کور وکچێن ئێزدی باوەری بۆ وان چێبت کو ئەو خودانێن ڤێ ئاخێ نە.

برایێن موسلمان،ئیرۆ هوین برا گەورەنە و گەرەکە هوین ئێزدیان وەکو چافێن خۆ بپارێزن ، چونکی گرنگی دانا هەوە ب هەموو پێکهاتان دێ پێگەهێ هەرێمێ ل جیهانا ئاشتیخواز ب هێزترلێکەت. باش ل بیرا مەتێت ئەو رێزگرتنا هەوە ل خەلکێ مەیێ ئاوارەبوی گرتی جهێ رێزگرتنێ بوو ، ڤەکرنا دەرگەهێن مزگەفتان بۆ ئاوارێن مە دێ بیتە بەشەک ژسەرفەرازیا دیرۆکا مە .هیڤیدارین بەردەوام بن ل سەر ڤان هەلویستێن جوامێرانە.

ئەوا پارێزگارێ دهۆکێ ل رێورەسمێن تازیا بابا شێخ گۆتی ،مخابن ئەو داخویانیا پارێزگاری ژ چارچۆڤێ وێ یێ دیرۆکی ئینانە دەر و پەیڤا وی نیڤ کوشتی کرن ، من ئەو رێورەسم ب رێڤەدبرن وپارێزگاری چەند جارەکان دوپات کر کو ئێزدی بەشەکی رەسەنن ژ ڤێ ئاخێ و گەرەگە ئەم شانازیێ ب ڤێ دیرۆکا رەسەن بکەن، نموونە ژی گۆت کو مەقامێ بابا شێخ پێش هزاران سالان د ناڤا شارستانیەتا وەلاتێن کەڤناردا هەبویە دگۆتنێ بابێ بابان، گەلۆ ما ئیرۆ نەشانازی یە تا نها ئەف مەقام دناڤا گەلێ مەدا مایی؟

ددرێژاهیا دیرۆکێ دا هزرێن توندرەو ئێزدی ژئاخا مە دوور کرینە وترسەک ددلێ تاکێ ئێزدی دا پەیداکرینە، هەموو جاران نەحەزێن گەلێ کورد ئەڤ چەندە خواستینە، هیڤیدارین باوەریێ بۆ گەنجێن ئێزدی چێکەن کو ئێزدی ژی شریکێن ڤێ ئاخێ نە، بۆ هندێ کوردستانا مە جوانتربت ، راستە برا موسلمان ئیرۆ رێژا هەرە مەزنن و پتر ژهەر پێکهاتەکی دی ئێزدی رێزەکا مەزن ل برا موسلمانان دگرن لێ پێکهاتێن دی ژی خودانێن ڤێ ئاخێ نە و هەموو ب هەڤرا کوردستانێ دێ جوانتر کەن.

ئەوا پارێزگاری گۆتی دلی هزاران گەنجێن ئێزدی خۆشکر کو هزر بکەن پارێزگارەکی موسلمان ئێزدیان پشتراست بکەت کو دیرۆکا وان پر کەڤنارە و بەشەکی رەسەنێ شارستانیەتا کوردستانێ نە ، دیارە ئارمانج ژێ ئەو بوویە کو گەنجێن ئێزدی پتر هەست ب هەبوونا خۆ بکەن ل ڤی وەلاتی.

ل پشتی 2014 نێزیکی 100هزار ئێزدیان قەستا دەرڤەی وەلاتی کرن.

360 هزار ئاوارەبون ، نێزیکی 1300 کەسان شەهید بون ، 2745 زارۆکان سێوی بون، 6417 کچ و خوشکێن مە کەفتنە بن دەستێ داعش دا و خەلکێ مە د نێزیکی 80 گۆرێن ب کۆم دا ل شنگالێ هاتنە دیتن. گەلۆ ئەڤە هەموو تێرا هندێ ناکەت بەرپرس و رایەدارێن مە هنەکێ خەمێن ئێزدیان سڤک بکەن هەگەر ب چەند گۆتنان ژی بت.

جارەکادن دووپات دکەم کو ناڤەرۆکا گۆتنا پارێزگاری دەربرین ژهندێ کر کو ئاینێ ئێزدیان ئاینەکی هەرە کەڤنێ کوردستانێ یە لێ ئیرۆ هەر شارستانیەتەکا ل کورستانێ هەبت سەروەت و سامانێ هەر کوردستانیەکی یە.

ل دوماهیێ ژی دبێژم کوردستان ئیرۆ بویە مەلبەندێ پێکڤەژیانێ ئەڤجا وەرن ئەم ب هەڤرا ڤێ جوانیێ بپارێزن .

زێدەتر ببینە

بابه‌تێن ب ڤێ مژارێ ڤه‌ گرێدای

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Back to top button
Close