راپورتكوردستان

دەستنیشانکرنا بابە شێخەکی نوو دناڤبەرا ڕازیبوون و نەڕازیبوونا ئێزیدیا دا

ئێزیدی24 – کاروان باعەدری

 

پشتی وەفاتا بابەشێخ شێخ خرتۆ حاجی ئیسماعیل ل دەستپێکا ئوکتۆبەرا چووی، دوهی (14 نۆڤەمبەرێ) ب ئامادەبوونا میر حازم میر تەحسین بەگ میرێ ئێزیدیا و جڤاتا رۆحانیا ئێزیدیا و بەشەک ژ سەرۆک عەشیرەتێت ئێزیدیا، “عەلی شێخ ئەلیاس” هاتە دەستنیشانکرن وەک بابەشێخێ نوویێ ئێزیدیا.

پشتی دانانا بابەشێخێ نوو، هەڤشێوەیی سیناریۆیێ دانانا میری کارڤەدان ب دووڤ خوە ئانین و جارەکا دی بەشەکی نەڕازیبوونا خوە دیارکرن ل سەر میکانیزما دانانا وی.

فەرهاد شێخ خرتۆ کورێ بابەشێخێ قەدەم گوهاستی و عەلی شێخ ئەلیاس کورێ بابەشێخێ بەری بابە شێخ خرتۆ و شێخ عەزام سادق شێخ عومەر بێبانی ڤان هەر سێ کەسا هەڤڕکی دکرن ل سەر پۆستێ بابەشێخێ نوویێ ئێزیدیا.

ل دانانا میرێ ئێزیدیا ژی دا، دابەشبوون کەفتە دناڤبەرا ئێزیدیا و بەشەکی نەڕازیبوونا خوە دانە دیارکرن، پاشی بەشەک ژئێزیدیێن شنگال ل وی باژاری “نایف داود” وەک میر ژ خوە رە دانان.

پشتی دانانا بابەشێخی نوو، میر حازم تەحسین بەگ میرێ ئێزیدیا بۆ میدیایا ڕاگەهاند، ئەوان بابەشێخێ نوو ل سەر ئەساسێ “عەدالەتی” دانایە، بەلێ ڤێ یەکێ ئالیێ نەڕازی بێدەنگ نەکر، دخوازن هەلویستی وەرگرن.

هەڤدژی داخویانیا میر حازم تەحسین بەگ، رۆژا دیتر ل بەر مەزارگەهێ شەرفەدین د کۆمبوونەکێ دا ب ئامادەبوونا ژمارەیەکا دیار ژ خەلکی و ریهــ سپیا، حەیدەر شەشۆ، سەرۆکێ پارتا دیموکراتا ئێزیدی و فەرماندەیێ هێزا پاراستنا ئێزیدخانێ گۆت، ئەوان ئاریشە ب چ  بەربژێرەکی بۆ دانانا بابەشێخ نینە بەلێ بریارا میر حازم رەتدکەین و ئەو نە میرە و پابەندی بریارا وی ژی نابن.

هەڤدەم، جەهوەر عەلی بەگ وەکیلێ میرێ ئێزیدیا گۆت،“میر حازم میرێ ئێزدیایە و نوێنەراتیا ئێزیدیا هەمووا دکە و دانانا بابەشێخەکێ ل سەر ئەساسەکی دروست بوویە ب  رەزامەندیا زۆربەیا ئێزیدیا بوویــە”.

دەربارەیی ئالیێ نەڕازی، جەهوەری ژ “ئێزیدی24” رە دیارکر،“بێ گومان هەموو خەلک ڕازی نابێ، هەتا بۆ دانانا میری ژی ئەڤ نەرازیبوون هەبوون،  بێ گومان چ بەربژیرەک رازیبوونا هەمووا ل سەر نینە”.

زێدەتر ببینە

بابه‌تێن ب ڤێ مژارێ ڤه‌ گرێدای

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Back to top button
Close