نووچە

وەلاتێ لیتوانیا د بتە دەرگەهێ دەلیڤا خواندنێ بۆ خۆرتێن وەلاتێن شەری زیان لێکرین

ئێزیدی24 – کلایبیدا

د کۆمبوونەکە ڤێ تالیێ یا گروپێ کاری یێ تایبەت ب کۆچکرنا یاسای یێ سەر ب کۆمسیۆنا ئەورپی ڤە، پرۆگرامێ خوەندەڤانێن رۆژهەلاتا ناڤەراست هاتە پێشکێشکرن وەک باشترین پرۆگرام لسەر ئاستێ هەموو وەلاتێن ئێکەتیا ئەوروپا ژبەر کو کار کرییە ژ بۆ روخساندنا رێک و دەلیڤا ژ بۆ کەسانێن پێتڤی ب پاراستنا نیڤدەولەتی هەین. لیتوانیا وەک وەلاتەکێ بچوکێ ئێکەتیا ئەوروپا یا گوهەرینین بەرچاڤ دکە و دەلیڤێن نوو بو خۆرتێن ژێهاتی پەیدادکە ژ وەلاتێ ئەڤغانستانێ و ئیراقێ و سوریا کو کەفتینە بەر پێلێن زیانێن شەری. ژ بۆ سمستەرێ پایزا 2020ـێ، 56 خوەندەڤان خوەندنا خوە ل زانکۆیا LCC یا نیڤدەولەتی یا کو دکەڤیتە باژێرێ لیتوانیا یێ کەنارێ کلایپیدیا دبەنە سەر. وەک زانکۆیەکا شێواز ئەمریکی یا خوەندنا بلند، خوەندن بتنێ بزمانێ ئنگلیزیە ژ بۆ هەموو خوەندەڤان کو ژ 50 وەلاتا پتر قەستا ڤێ زانکۆیێ دکن. زانکویا LCC تاکە زانکۆیە ل وەلاتێ لیتوانیا پروگرامێن خوەندنێ یێن تایبەت پێشکێشی گەنجێن وەلاتێن روژهەلاتا ناڤەڕاست دکە.

نازم غانم دبێژت، “ئەز گەلەک سوپاسدارێ زانکۆیا LCC یا نیڤدەولەتی مە ژ بەرکو دەلیڤە بۆ من روخساند خوەندنا خوە تەمام کەم. ئەڤ زانکۆیە نە بتنێ زانینێ ددەتە من، خوەندنا من ل ڤێ زانکۆیێ دەلیڤە بۆ من پەیداکرن کو پەیوەندیێ لگەل خەلکێ وەلاتێن جودا و خودان سەربۆرێن جودا بکەم و ئەڤێ چەندی ئەز یێ کری مە کەسەکێ ئەرێنی و مێشک ڤەکری. ئەز د وێ باوەریێ دا مە کو خوەندنا رێڤەبرنا نیڤدەولەتی دێ هاریکاریا من کەت و بتە کلیلەک ژ بۆ ڤەکرنا دەرگەهێ ژیانەکا باشتر ژ بۆ جڤاکێ من”.

هەژییە بێژین کو نازم بو ماوێ پێنج سالا لکەمپا خانکێ لگەل خێزانا خوە دژیا. نوهە نازم خوارنێ ژ بۆ جڤاکا خۆ پەیدادکەت و خۆبەخشانە وانێن ئنگلیزیێ ژ بۆ زارۆکا د بێژت. نازمی باورناما بکالوریوس ب چاندا (ئەدەبا) ئنگلیزی هەیە و هیڤی خوازە کو وەلات رۆژەکێ ژ رۆژان بگوهەرە و ئەو بکارت ڤەگرت وارێ خوە دا کو مال و جڤاکا خۆ ل وەلاتی جارەک دن ئاڤابکە و بێ ترس بژی.

پروگرامێ خوەندەڤانێن روژهەلاتا ناڤەراست تایبەتە بۆ خۆرتێن ژێهاتی ژ ئەڤغانستانێ و عراقێ و سوریا. مەرەم ژ ڤی پرۆگرامی ئەوە کو خۆرتێن ڤان وەلاتا نەبن نفشەکی وندا بەلکو ببن خوەدانێن دەلیڤا ژ بو خوەندنێ وپاشی بزڤرن وەلاتێن خوە دا جارەک دی ئاڤابکەن و تێدا دیموکراسی و پرینسیپێن مافێن مروڤی تێدا سەرهلدەن.


‏حنان دەروێش شەمۆ دبێژت “من بکالوریس ب خوەندنێن پزیشکی هەیە و نها ئەز ل نەخوشخانەکا باژێرێ موسل کاردکەم، لێ ئەڤ دەلیڤا زانکۆیا LCC دایە من، ئەز دێ بمە هەلگرا باورناما ماستەرێ و ئەز دبینم ئەڤە دەستپێکەک نووە د ژیانا مندا نەبتنێ ژ بۆ پرۆژێن پزیشکی، ئەز باوەردکەم چوونا من بۆ ئەورپا، تێکەلکرن لگەل خەلکێ خودان کەلتورێن جودا و بدەستڤەئینانا زانینێن نیڤدەولەتی دێ هاریکاریا من کەن دەرگەهێن نوو ڤەکەم و وسا دێ مفای گەهینم وەلاتێ خوە ژی”. حنان تاکە کەسە ژ خێزانا خۆ کو ل عراقی مایە و بزاڤێ دکە کو ببت کەسەکا سەربەخۆ و پشتبەستنێ لسەر خوە بکە.

‏مەرەم ژ پروگرامێ خوەندەڤانێن روژهەلاتا ناڤەراست-کو هاتی یە دروستکرن ژ لایێ زانکویا LCC یا نیڤدەلەتی دگەل وەزارەتا کاروبارێن دەرەڤە- ئەوە کو خەلکێ وەلاتێن توشی شەری بویین بکەن سەرکردێن هەڤچەرخ. بهێزکرنا جڤاکێن نافخوی لوەلاتێن شەر بسەردا هاتی مەرەمەک دی یا پروگرامی یە ئەوژی برێکا پێشکێشکرنا خوەندنێ و زانینی و سەربۆرێن نیڤدەولەتی کو دێ هزرا گەنجا فرەهتر لێکەت و بتە ئەگەرێ گوهەرینا لڤان وەلاتێن شەری لاوازکرین.باوەری هەیە کو برێکا خوەندنەکا شێواز روژئاڤایی، گەنج بکارن دەست بگوهەرینا بکەن و جێبەجێکەن لوەلاتێن خوە.

‏نها، 13 قوتابی ژ ئەڤغانستانێ، 39 ژ ئیراقێ، و 4 ژ سوریایێ خوەندنا خوە د بەنە سەر ل زانکۆیا LCC یا نیڤدەولەتی د پروگرامێن بکالوریوسێ و خوەندنا بلند دا. ڤان خوەندەڤانا هەمووا باوەری هەیە کو ئەڤ دەلیڤە ژ بۆ باشکرنا شیانێن ژیانێ و یێن کاری ل زانکۆیا LCC دێ هاریکاریا وان کەت کو ببن کەسێن قازانج بەخش ژ بۆ وەلاتێن خوە.

‏ئەڤ پرۆژە ب پالپشتیا وەزارەتا کاروبارێن دەرڤە یا لیتوانیا د هێتە ئەنجامدان کو دبە ئەگەرێ جێبەجێکرنا ئارمانجێن کارناما وەلاتێن هەڤگرتی ژ بۆ گەشەکرنا بەردەوام هەتا سالا 2030ـی.
‏ ‏

زێدەتر ببینە

بابه‌تێن ب ڤێ مژارێ ڤه‌ گرێدای

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Back to top button
Close