جیهانراپورت

ئێزدیێن کۆچبەر؛ دناڤبەرا حەلیانا ل دەرڤە، نە گرەنتیا ڤەگەڕیانا وەڵاتی دا

ئێزیدی24 – کاروان بــاعەدری

 

”چەند بچیت ئێزیدیێن عراقێ کۆچ دکن”، وان ژی ئەگەر هەینە، رێژە ب ژمارە بەرەڤ زێدەبوونێ یە ئەوژی ل دووڤ داتایێن ڕێڤەبەریا گشتیا کاروبارێن ئێزیدیا ل وەزارەتا ئەوقاف و کاروبارێن ئاینی.

ڤان نەهامەتی و نەخوەشیا، بەرۆکێ کێم ئاینا بەرنەدایە ل عراقێ، بەشەک ژ ئاینا ڕێکین دی ژ خوە رە هەلبژارتینە، ژبۆ مانەوەیا ئاینێ خوە، یەک ژ وان ژی کۆچبەری بوو، ئێزیدیا ژی ئەڤ رێک هەلبژارت، پشتی ساڵا 2014ـێ ژمارە زێدەتر لێ هات.

پشتی ساڵا 2014ـێ هەر ل دەستپێکی داتایێن ڕێڤەبەریا گشتیا ئێزیدیا، زێدەتری 100 هەزار کەسا کۆچبەری دەرڤەیی وەڵاتی بوون، ل ڤان داتایێن تالی، ژمارە ژ 110 هەزار کەسا پتر لێهاتیە ئەڤە ئامارە ژی خوەیا دکن کو رێژە دزێدەبوونێ دایە.

داود خێرۆ، زەلامەکێ ئێزدیی خەلکێ گوندێ تڵقەسەبە یێ کو دکەڤیتە باشوورێ باژارێ شنگالێ ل گەل خێزانا خوە پشتی فرمانا 2014ـێ ئەوا ژ ئالیێ دەولەتا خیلافەتا ئیسلامیا ل عراقی و شامێ کو ب داعش هاتە بناڤکرن ئاوارەیی هەرێما کوردستانێ بوون پشتی مانا وان ب چەند هەیڤا کۆچبەری دەرڤەیی وەڵاتی بوون، نوهە ل ئەڵمانیا دژین.

5 ساڵ بەریا نوهە داود ل گەل خێزانا خوە هاتنە وەڵاتێ ئەڵمانیا و ل باژارێ کۆڵن دژین، و هەموو ماڵ و مولکێ خوە ل عراقێ ب جهــ هێلاینە، ئەو دبێژیت،“کەس نزانێ دێ چ ل چارەنڤیسێ مە ئێت، هەر ددەمە هزرێت خوە ئاوارەیی و کۆچبەری و ڕەڤین ل پێ مەیە، مە چ خوەشی ژ خوە نەدیتیە”.

” ئەڤ وەڵاتە نە چارەسەرە، و مە خوەشی ل وەلاتێ خۆ ژی ژ خۆ نەدیتیە، ڕاستە ئەم ل ڤر ب سلامەتن، لێ هێشتا نەدیارە کا دێ چارەنڤیسی مە چلێ ئێت”،داودی وسا ژ “ئێزیدی24” رە گۆت.

ل پێ ئامارێن نەفەرمی سەرژمێریا ئێزیدیا ل سەرانسەری دنیایێ زێدەتری ملیۆنەک کەسانە و زێدەتر ژی دکەڤنە عراقێ، زۆربەیا وان ل شنگال و شێخان و دهۆک و دەشتا نەینەوا دئاکنجینە.

ب گۆرەیی گۆتنا “فەیسەل نایف”، زەلامەکی دی ترە نها ئەڤە 4 ساڵن ل هانۆڤەرا وەڵاتێ ئەڵمانیا دژیت، بەریا نوهە ل گرعزێربوو بوو ل باشووری چیایێ شنگالێ، کو ب بەلەنگازیێ ژی رازیبوو ل وەڵاتێ خۆ بمینێ، لی داعشێ ئەو ڕێکە ژی بۆ وان نەهێلا کە پێ بژیت.

ناڤهاتی گۆت،“مە هەموو تەمەنێ خوە ل شنگالێ دەربازکربوو کو مە دڤیا ب ئارامی بژین، لێ دوژمنا ڕێک نەدا، مە ژی ڕێکا ئەوروپا هەلبژارت، داکو بەس بتنێ بژین”.

فەیسەل ل عراقێ مامۆستایێ خوەندنگەهەکێ بوو، پشتی چوویە ئەوروپا هاتیە دابڕاندن (فەسلکرن) ژ خوەندنگەهێ، ئەو دبێژە،“ئەگەر بزڤرمە عراقێ ژی من چ کار نینە بکم، و نکارم خێزانا خوە ژی ببەم چونکی هەتا نوهە جهێ ژیانا خەلک کێم ڤەگەریایە و هەتا نوهە ناکوکی هەینە”.

فەیسەلی هزر نەکریە ڤەگەڕیێ و دبێژە،“جارێ دهزرا من دا نینە ڤەگەڕم، و نزانن چارەنڤیسی مە ل ڤان وەڵاتا ژی چلێ ئێت، مە بەر ب کیژ کەنارێ دنیایێ بەت”.

“ڕاستە گەلەک دبیژن ل ڤێدەرێ ئاین دحەلیێت، و ئەز ژی ڤێ هزرێ دپەژرینم چونکی ل گەل بۆرینا دەمی خەلک دێ تێکەلی جڤاکێ ئەوروپی بیت، و گەلەک کەس ڤێ یەکێ دزانن بەس ئەو نکارن ڤەگەرنە وەڵاتێ خوە ژی ژبەر چارەیەک نینە ل وەڵاتی و گرەنتییەکا ئەمنی نینە” فەیسەڵی ل تالیا پەیڤا خوە دە وسا ژ “ئێزیدی24” رە گۆت.

زێدەتر ببینە

بابه‌تێن ب ڤێ مژارێ ڤه‌ گرێدای

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Back to top button
Close