ئێزیدی24 – مەروان داوود
ئیسال ژبەر بەلابوونا زێدە یا ڤایرۆسێ کۆرۆنا خوەندنکار تووشی گەلەک ئاستەنگا بوون و ڤێ یەکێ کارتێکرنەکە نەرێنی لسەر خوەندنا وان هەبوو بوو، و ل تالی جار ژی لژنا بلندا بەرهنگاربوونا ڤایرۆسێ کۆرونا دگەل ئەنجوومەنێ وەزیرا ل هەرێما کوردستانێ کۆمبوو و بریار هاتە دان دەرگەهێن خوەندنگەها هەتا 7 هەیڤا 1 سالا 2021 گرتی بمینن و خوەندنا زانینگەهـ و پەیمانگەها ژی ب سیستەمێ تێکەل وێ بەردەوام بێ.
“حەمزا رەزیکی” بەرپرسێ ڕاگەهاندنا ساخلەمیا پارێزگەها دهۆکێ ژ “ئێزیدی24” را گۆت،“بەری کە ناڤەندێن خوەندنێ ل کوردستانێ بێنە گرتن رۆژانە گەلەک حالەتێت ڤایرۆسێ کۆرۆنا دهاتنە تۆمارکرن، نەخاسمە ل پارێزگەها دهۆکێ هنەک رۆژا دگەهشتنە 300 هەتا 400 حالەتا و ئەڤ ژی ئامارێن مەترسیدار بوون”.
گۆت ژی،“پشتی بریار هاتیە دان ناڤەندێن خوەندنێ بێنە گرتن ئەڤ ئامار ب شێوەیەکی گشتی ل هەموو پارێزگەهێت هەرێما کوردستانێ هاتنە گوهەرین و حالەتێت پیکەتنێ ب رێژەیا 60% کێم بوون”.
و ل تالیا پەیڤا خوە دا گۆت،“کەمپێت ئاوارا ل سنوورێ پارێزگەها دهوکێ هەر ئەو ژی ب سەر پارێزگەها دهوکێ ڤە دهاتنە هژمارتن وەک ئامارێت دگەهنە بەر دەستی مە ل کەمپا ژی دا نوهە حالەت ل کێم بوونێ داینە”.
