ئێزیدی24 – دهۆک
پشتی کە ل زانکۆیا ئەمریکی – دهۆک ل بەشێ پەرستاری هاتینە وەرگرتن، ب هیڤی بوون کە ب باوەرنامیا دەرچوونێ ڤە ژ ئەڤێ زانکۆیێ دەرکەڤن لێ هەبوونا چەند پرسگرێکا هیڤیێت وان هێدی هێدی دکوژە.
یەک ژ وان خوەندنکارا کە نەخوەست ناڤێ وی دیارببێ دبێژە،”پشتی ئەم هاتین وەرگرتن ل زانکۆیا ئەمریکی یا دهۆک ئەم گەلەک کێف خوەشبوون بەلێ پشتی مە سەرەدانا زانکۆیێ کری دا ئەم ناڤێت خوە تۆماربکەن ئەم مەندەهۆش مان”.
هەروەها گۆت،”هندەک مەرج هاتینە دانین بۆ خوەندنێ ل ڤێ زانکۆیێ لێ ئەو مەرج گەلەک ب زەحمەتن بۆ مە وەک ئاوارە کە یەک ژ ب زەحمەتترین مەرجێن وان ئەوە کەفالەت ب پێنج دەفتەر دۆلارا بێت و کەس ئامادە نینە ئەڤی باری بێخیە ستویێ خوە”.
“مەرجێ دی یێ ب زەحمەت ئەوە کە دەهـ سالا پشتی دەرچوونێ دڤێ ل هەرێما کوردستانێ بمینی و خزمەتێ بکی ل ئەم نزانن کا سالێن تێن چ ب خوە رە هلگرتیە و ڤێ یەکێ پتر بارێ مە گرانکریە” ل بەردەوامیا پەیڤا خوە دا وسا گۆت.
ل تالیێ گۆت،”ئەم داخوازێ ژ هەموو بەرپرسێت ئێزیدی و هەموو جیهەتێت بەرپرس ل پارێزگەها دهۆکێ دکن کە ئەڤ مەرج بێنە ڕاکرن یان ژی سڤک کرن ل سەر مە دا ئەم کاربن خوەندنا خوە تەمامکن”.
ژئالیێ خوەڤە ڕاوێژکارێ سەرۆکێ حکومەتا هەرێما کوردستانێ بۆ کاروبارێن ئێزیدیا “شێخ شامۆ” ژ “ئێزیدی24” را گۆت،”هەر ژ دەمێ کە پرسگرێکا ڤان خوەندنکارێت ئێزیدی گەهشتیە مە ،دگه‌ل جیهەتێن بەرپرس ل پارێزگەها دهۆکێ و زانکۆیا ئەمریکی و رێڤه‌به‌ریا گشتی یا ساخله‌میا دهۆكێ مه دووڤچوونا ڤی بابه‌تی كریه و هه‌می هه‌وله‌ك مه دایه بۆ دیتنا رێگه‌چاره‌یه‌كێ”.
زێدەتر گۆت،”ئەڤ مەرجێن کە هاتینە دانین ژ ئالیێ زانکۆیا ئەمریکی ب هەماهنگی دگەل حکومەتا هەرێما کوردستانێ بۆ تژیكرنا ڤالاهیا کێمیا کارمەندێن تەندروستی هاتینە دانین و گوهەرینا وان مه‌رجا ب زەحمەتە وەک وان ئەنجامێن ب دەست مە کەفتین”.
