راپورت

چار خۆرت، وێ چیرۆکێت رزگاربوویێت دەستێ داعش دکیومێنت کن

ئێزیدی24 – مەروان داوود 

گروپەکی خۆرتێت ئێزیدیا کە پتریا وان خوەندنکارێت زانینگەهاینە ل وەلاتێ ئەلمانیا وێ دەست ب دکومێنتکرنا چیرۆکێت رزگاربوویێت ئێزیدی یێت کە ژ دەستێ داعش دەرکەتین، و ئەڤ چیرۆک وێ ل پەرتووکا دە ئێنە کۆمکرن.

سەعید ملحم، یەکە ژ دامەزرێنەرێت ڤی گروپی ژ “ئێزیدی24” گۆت، “ئەوا ل سالا 2014ـێ ب سەرێ ئێزیدیا دا هاتی ل شنگال تەعدە ل مە هەمووا کر و پشتی وێ فەرمانێ هژمارەکە مەزن ژ ئێزیدیا چوونە ژدەرڤە و ئەم ژی ژ وان بوون یێت هەکە چووینە ژ دەرڤە”.

 ل دۆر ڤێ هزرێ گۆت، “هەر ل دەستپێکا فەرمانێ مە ئەڤ هزر هەبوو و مە ب فەر دیت کە ڕابن ب شێوەیەکی وێ فەرمانێ دکومێنت بکن وەک کارینێت خوە”.

 خوەیاکر ژی، “ئارمانجا مە ژ چێکرنا ڤی گروپی ئەوبوو کە ئەم ژ خەلکێ را بدنە خوەیاکرن کا ل سالا 2014ـێ ل سەر دەستێ داعش چ ب ئێزیدیا هات”.

زێدەتر گۆت، “هەر دیسا یەک ژ ئارمانجێت مە ئەوبوو ئەو پەرتووکێن ئەمێ نڤیسن بمینن وەک بەلگەیەک دا فەرمان نەیە ژبیرکرن”.

 گۆت ژی، “ئەم ب زمانێ ئەلمانی نوهە دنڤیسن و ل پاشەڕۆژێ ئەڤ چیرۆک وێ ئێنە وەرگێڕان بۆ هنەک زمانێن دی ژی، یەک ژ گرنگترین ئارمانجێت مە ئەوە ئەم ژ خەلکێ وەلاتێت رۆژئاڤا را ڤێ چەندێ بدنە خوەیاکرن کا چ ب سەرێ ئێزیدیا هات”.

ل تالیا پەیڤا خوە دا گۆت، نوهە مە چار چیرۆک هەلبژارتینە و ئەم کار ل سەر نڤیسانا وان دکن و ل دەمێن بهێت دا وێ کەڤنە بەر دەستێ خوەندەڤانا”.

زێدەتر ببینە

بابه‌تێن ب ڤێ مژارێ ڤه‌ گرێدای

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Back to top button