مەروان داود – ئێزیدی24
رێکخراوا خوارنا جیهانی W F P بۆ ماوەیێ هەفت سالايە، مەهانە دناڤبەرا 12 هەتا 20 هزار دینارێن عراقی ددا هەر کەسەکی ئاوارا دناڤ کەمپا دا، و پتریا خێزانێن ئاوارا ژی پشتبەستنا خوە لسەر وی دراڤی دکرن ژ بۆ رێڤەبرنا ژیانا خوە و خێزانێت خوە، لگۆر رێڤەبەریا کۆچ و کۆچبەرا و بەرسڤدانا قەیرانا ل دهۆک بریار ژ ناڤەندا سەرەکی یا رێکخراوا WFP هاتیە هەر ژ سەرێ مەها بێت دا ئەو دراڤ بهێتە قوتکرن و ب ئەڤێ چەندێ ژی ئاوارا دلگران بووینە.
“نایف خەلەف” ئێک ژ ئاوارەیێن خەلکێ شنگالا ل کەمپا شاریا لدور ڤی بابەتی ژ ئێزیدی24 را گۆت،” ئەڤ نیزیک هەشت سالایە ئەز ب خێزان ڤە دناڤ کەمپێ دامە و هەبوونا ڤی دراڤێ ژ ئالیێ رێکخراوا WFP ڤە دهات هاریکاریەکە گەلەک باش بوو ژ مە را و هەتا رادەیەکی باش مە کاری ئەم دەبارا ژیانا خوە ب وی دراڤی بکن”.
د بەردەوامیا پەیڤا خوە دا گوت ژی، “ژبەر هندەک نەخوەشیێن جەسەدی بۆ ماوەیێ چەند سالایە من نکاری ئەز کار بکم و هەبوونا ڤی دراڤی هاریکاریەکا مەزن بوو کو ئەز بکاربم خێزانا خوە پی خودان بکم نە ئەز بتنێ بەلکو دناڤ کەمپان دا چێدبیت ب هەزارا خێزان هەبوون پشتبەستنا خوە لسەر ڤی دراڤی دکرن”.
ل تالیا پەیڤا خوە دا گۆت،”ئەم هێڤیدارن داخوازی ژ رێکخراوێ بێتە کرن ژ ئالیێ جیهێن بەرپرس ڤە و ئەڤ دراڤ نەهێتە قوتکرن ژبەر هەکە هاتە قوتکرن ب ئێکجاری وێ کارتێکرنەکا مەزن ل ژیانا خەلکێ لناڤ کەمپا دا بێ ب تایبەت ئەوێت بەلەنگاز و بێ کار یان ئەوێت کە چ کەسێت خودان کار و بکاربن کار بکەن دناڤ مالێن وان دا نەین”.
“پیر دیان” رێڤەبەرێ ڕێڤەبەریا کۆچ و کۆچبەرا و بەرسڤدانا قەیرانا ل پارێزگەها دهۆکێ د دیدارەکی دا لدور ڤی بابەتی گۆت، “ئەم د پەیوەندیان دانە دا کو پێگهۆرەکی ببینن، ڤەکێشانا رێکخراوا ژ ناڤ کەمپێت ئاوارا دبیتە بارگرانی یەکا مەزن لسەر ملێت حکومەتا هەرێما کوردستانێ و هەر وسا بۆ رێڤەبەریا کۆچ و کۆچبەرا ژی”.
خوەیاکر ژی،”هەولێت مە د بەردەوامن دگەل دەزگەهێ خێرخوازیێ بارزانی و وەزارەتا ناڤخۆ دا ئەم بکاربن UN و حکومەتا عراقێ بیننە سەر خەت ژبەر کو ئەڤە ئەرکێ حکومەتا عراقێ یە ژبەر ئەڤ ئاوارا خەلکێ پارێزگەها نەینەوا نە و ب سەر عراقێ ڤەنە لۆما ژی ئەرکێ حکومەتا عراقێ یە خزمەتا ڤان ئاواران بکە”.
