مەروان داود – ئێزيدی24
سبەهـ ل کەمپێن ئاوارا یان ب گەرمەکە زێدە یان ژی ب جەمەدەکە زێدە دەستپێدکن، لێ رۆژ هەر سبەهـ ل ناڤ ریزێن پەرتووکا زیندەوەرزانی را ل هیبا دەردکەت، شلۆڤەیا هەموو بەشێن لەشی دکر فەرمان و پێزانین دخوەندین و ل ناڤ ریزێت چادرا دە غەم و ئێشێت خوە و خەلکێ خوە دهژمارتن.
ئاوارەیی نە بتنێ نەخوەشی و دەردەسەریە، گەلەک تابلۆیێت جوان و ل ناڤ دە چیرۆکێت بالکێش هەینە، یەک ژوان تابلۆ و چیرۆکا هیبایە.
د کەمپێن ئاوارەیێن ئێزیدی دا دناڤ هەر خیڤەتەکێ دا هندەک چیرۆکێن دلئێش و ب زەحمەت هەنە، سەرارەیی ئاوارەبوونا هەشت سالان یا ئێزدیان و ژیانا وان دناڤ کەمپان دا، لێ دناڤ ئەڤێ ژیانا ب زەحمەت دا گەلەک کەسێن خودان شیان و سەرکەفتی هەنە ب تایبەت ژی قوتابی و چ جاران خوە بێ هیڤی ناکەن و بەردەوام کار دکەن ژ بۆ پێشخستنا خوە .
رامانا ئاوارەبوونێ
“هیبا قاسم” ئێک ژ وان کەچێن ئاوارەیە دناڤ کەمپەکێ دا دژیت بۆ ماوەیێ هەشت سالانە، ئەو قوتابییا خواندنا زمانێ عەرەبی بوو، پێش هاتنە داعش ئەو دگەل مال و کەس و کارێن خوە ل ناحیە سنۆنێ بوو. هیبایێ کاریبوو ل سالا خواندنێ یا 2019 – 2020 تێکرایێ 100% لسەر ئاستێ هەموو عراقێ ل خواندنا زمانێ عەرەبی ب دەستخوەڤە بینی، و ب ئەڤێ چەندنێ هیبە دبێتە یا ئێکەمین لسەر ئاستێ هەموو عراقێ.
“نەخوەشیا ئاوارەبوونێ و دوورکەفتنا مە ژ جیهـ و وارێن مە و ژیانا ب زەحمەت یا دناڤ کەمپان دا ئەڤ هەموو تشت ل بەرامبەر من نەبوونە رێگر، ئەز خەونا خوە ب جیهـ نەینم، رۆژانە دناڤ خیڤەتەکا چار میتر دا من زیدەتر ژ دەهـ سەعەتان دخواندن، و جیهێ ئەز تێدا دژیام ئێکسەر ژی یێ گۆنجایی نەبوو ژ بۆ خواندنێ ژبەر ل زڤستانێ دەنگێ بارانێ دهات و گەرما هاڤینی نەبوونا کارەبا بەردوام ژی و شەوتاندنا چادرا ژی، هەبوونا ڤان هەموو ئاستەنگێن دناڤ کەمپێ دا کارتێکرن ل دەروونی من دکر، لێ هەر من هەڤرکیا ڤان هەموو زەحمەتان دکر، و بەردەوام کار دکر دا کو بگەهمە هیڤین خوە” هیبا وسا چیرۆکا خوە دەستپێکر.
گۆت ژی،”ئاوارەیی ڕامانا دەستدانینێ نادە بەلێ ئاوارەیی ژ من را بوو شاخەک ژ سەرکەفتنێ و بووە پالدەرەکی ب هێز دا ئەز ب گەهمە خەونا خوە و دخوازم رۆژەکێ هاریکاریا خەلکێ خوە بکەم و ڤێ سەرکەفتنێ پێشکێشی خەلکێ خوە بکەم”.
ئاوارەیی ڕامانا دەستدانینێ نادە بەلێ ئاوارەیی ژ من را بوو شاخەک ژ سەرکەفتنێ و بووە پالدەرەکی ب هێز دا ئەز ب گەهمە خەونا خوە
پەیام
هیبا دڤێ هنەک کەچێن دی ژیمفایێ ژ سەربۆرا وێ وەرگرن و ببنە نموونەیەکە باش ژ سەرکەفتنێ و ئاوارەبوونێ رە، ئەوا هیبا بدەستخوەڤە ئانی ل کەمپێ دە مەزنتر بوو ژ گەلەک دەستکەفتێن هنەک چالاکڤان و کەسێن کە ژ بەرژەوەندیێت خوە رە کاردکرن.
“پەیاما من ژ هەموو قوتابیان را و ب تایبەت ژی یێن دناڤ کەمپان دا ئەوا هەر لسەر خواندن و حەزێن خوە د بەردەوام بن و کار بکەن ژ بۆ ب دەستڤەئینانا پاشەرۆژەکا گەشتر و خوەشتر و بارودۆخێ ب زەحمەت دناڤ کەمپان دا نەکنە حیجەت کو دەست ژ هیڤی و خواندنا خوە بەردن، بتنێ خواندن دکارێت ئەڤێ ژیانا مە یا ب زەحمەت بگهۆرێت و مە بەرەڤ ژیاناکە گەشتر و چێتر ببەت” وسا ئاماژە دا.
بەردەوام بوو و گۆت،”جیهان هەموو شاهدە ل سەر ئەوا داعش ب سەرێ ئێزیدیا کری، ئێکسەر ژی کەچ و ژنێن ئێزیدی بلا ئیدی ئەوا داعش کری ژ مەرە ببیە سەربۆر و ئەم ب زانینێ نەزانینا وان ژ خەلکێ رە خوەیاکن و مافێت خوە ب قەلەمێت خوە ب دەست خوەڤە بینن”
پالدەر
“ئەو هەموو تاوانێن و نەخوەشێن داعش ب سەرێ مە و خەلکێ مەدا ئیناین گەلەک ژ ئەڤێ ژیانا مە نهو ب زەحمەتر بوون، هیڤیدارم ئەم بکاربن سەربۆرەکێ ژ وان هەموو نەخوەشیان وەرگرن و ژ خوە را بکەنە هێزەک و بکاربن پلەیێن بلند ل هەر جیهەکی ب دەستخوەڤە بینن” وەسا خوەیاکر.
گۆتژی،”نهو ئەز قوتابی مە ل” زانکۆیا کوردستان – هەولێر ” ل کۆلیژا پزیشکیا گشتی ل قوناغا سیێ و هیڤیدارم رۆژەکێ دبوارێ پزیشکێ دا ئەز بکاربم خزمەتەکی پێشکەشی مالبات و خەلکێ خوە و مرۆڤاتیێ ب گشتی بکەم، و کاروانێ زانین و خواندنا من دێ بەردەوام بێت”.
