تۆماس ژ دۆزەخا داعش بەرب ژیانکرنێ ل شنگالێ

ئێزدی24 – مروان داود 

“ژ عەزابێ گۆشتێ لاشێ من هێدی هێدی خەلاس دبوو، ل خەیالان ژی دا من باوەرنەدکر جارەک دی ئەز ڤەگەرم ژیانێ، داعش خەلک هانددا بۆ شەری ب بهانەیا چووینا بەهشتێ لێ دڕاستی دا ژیان دگەل وان دۆزەخ بوو ئەڤجا نزا چاوا ل ئاخرەتێ ئەو دێ چن بەهشتێ”

“تۆماس عبدالله” کوڕەکی ئێزیدی بوو پێش هاتنە داعش ب مالبەتە خوە را ل باژیرێ شنگالێ یێ نشتەجیبوو، وەک هەر کەسەکی ئێزیدی ب ماڵباتا خوە را ژیانا خوە دەرباس دکر، ل ڕۆژا ٤ـێ هەیڤا ا۸ یا سالا ۲٠۱٤ـێ تۆماس دگەل چوار خویشک، و برایێن خوە دکەڤیتە دەستێ داعش، تۆماس هیژ یێ د دەستپێکا زارۆکینیا خوە دا بوو وەختێ کەفتیە دەستێ داعشان دا و بتنێ ل وی وەختی تەمەنێ وی ۹ سال بوون.

تۆماس دبێژێت،” پشتی ئەم ژ لایێ داعشێ ڤە هاتینە ڕەڤاندن ئەم هاتنە رەوانەکرن ژ بۆ باژیرێ تەلەعفەر و د وی وەختی دا ئەز یێ د تەمەنەکی بچووک دا بووم ، من گەلەک دیمەنێن ب ترس و ب زەحمەت دیتن، ئەوان دیمەنان گەلەک کارتێکرن یا نەرێنی لسەر بارێ من یێ دەروونی و ژیانا من کر . ل تەلەعفەر ئەز دگەل ب سەدان زارۆکێن دیتر، ب زووری ژ بۆ داعشێ بوونە کوێلا و هەر تشتەکی وان دڤیا ب مە دکرن.

ل مۆسل زۆری ب من هاتە کرن ئەز قورعانێ ژبەر بکەم و بخوەندم، هەر جارەکێ یا ئەم سبەهێ نەرابووبانا سەر سەلاواتان داعش ئەم د دانە بەر بوکس و شەقان، و هەتا ئێک ڕەهـ ژ لاشێ مە دلڤییا وان ل مە ددا، گەلەک جاران ئەم ل مووسڵ ژ لایێ فرۆکەیان ڤە هاتنە تۆپبارانکرن دناڤ داعشان دا، ب دورستی ئەز نزانم کا ل وی وەختی ئەز ل کیژ جیهێن مووسڵ بووم لێ ل بەر چاڤێن من ئەو ئاڤاهیێن مەزن دهاتنە خراکرن ب سەدان مرۆڤ بریندار بوون و ل بن کاڤلان دا مان”.

“پشتی مووسڵ ئەز دگەل سەدان زارۆکێن دیتر هاتمە ڕەوانەکرن ژ بۆ باژارێ” ڕەقایێ ” یان ( پایتەختێ دەولەتا ئیسلامی ل عیراق و شامێ یا بەرنیاس ب داعش ) ل ڕەقایێ ئەز ل سەر هەموو جورێن چەک و تەقەمنیان هاتمە فێرکرن و ڕۆژانە ئەم دبرنە سەربازگەهان و هندەک جاران ل دەمێ هێزێن سوریا دیموکراتی یا بەرنیاس ب
” هەسەدێ ” داعشان ئەم دبرن و وەک مەرتال بکاردئینان” وەسا درێژی دا ئاخفتنا خوە.

“توماس” ب چاڤێن تژی هێستر و گری ڤە دبیژێت،” ئێک ژ ب زەحمەترین و دڵێشترین تشتێن من دیتی ئەو بوو وەختێ خویشکا من ب زۆری ژ با مە برین و د شیانێن مەدا نەبوون ئەم داعشان بسەکنینن کو خویشکا من نەبن، من ژی ب دەنگەکی بلند دکرە هاوار و گری”.

زیدەتر ژی گۆت،” وەختێ ئەم ل مووسڵ د گرتیگەهێن داعشان دا گەلەک جاران ئەم دبرن و دیمەنێن ب ترس و خەلک ل بەر چاڤێن مە ددانا بەر فیشەکان و سەرێ خەلکێ ژێدکرن، نە بتنێ ئەم لسەر چەکان فێر دکرن بەلکو لسەر دیمەنێن توندرەو ژی دهاتنە فێرکرن ، گۆت ژی پشتی نێزیک سێ سالان و د ڕۆژەکا گەرم یا هەیڤا ۷ دا داعشان ئەم ئینان مووسڵ و وەک مەرتال بکارئینان و وان شەرێ لەشکەرێ عیراقێ دکر.

گۆت ژی،” ئەز دناڤ ئاڤاهیەکێ دابووم و گەرمییا شەرێ هێزێن عیراقێ و داعش بوون، فرۆکەیان ئەو ئاڤاهی تۆپباران کرن و ئەز ل وی وەختی ب گرانی بریندار بووم، داعش ژی ئەز ژ وی ئاڤاهیێ برمە خانیەکی دیتر، ل ئەوی خانی دا ڕێکا دەرکەفتنێ نەبوو و گەلەک زەحمەت من دیتن نا خوارن هەبوو و نا ڤەخوارن، جارەکێ و ل وەختەکی نا چاڤەڕێکری دا فرۆکەیان ئەو خانی ژی توباران کر و ئاڤاهی ب تەمامی ب سەر مە دا هاتە هەڕفاندن، پشتی هێزێن عیراقی یێن تایبەت ب ئۆپراسیوونا کۆنترۆلکرنا مووسڵ ڤە گەهشتنە وی جهی ئەز ژ بن ئاڤاهیێ دەرئێخستم و برمە نەخوەشخانا ئەمریکیان ل تاخێ حەمام عەلی پشتی ئەز ب سەر هەشێن خوە هاتیم هێزێن عیراقێ لێپرسین دگەل من کرن لێ من شیانێن پەیڤێ نەبوون ئەز هەموو دهاتمە شەوتاندن وەک جەسەد و وەک رۆح و وەک دەروون ژی، بتنێ ئەو تشتێ دناخێ من دا شیانێن پەیڤێ هەین بتنێ ئێک پەیڤ بوو ئەو ژی ” ئەز زارۆکەکی ئێزیدیمە ” پشتی هنگی پرسیارە ژمارەیا تێلەفۆنا بابێ من کرن، پشتی چەند دەمژمێران بیهنا من فرەهـ بوو ئەز ب بابێ خوە را پەیڤتم ل وی وەختی مالا بابێ من ل ” کەمپا کەبەرتوو ” بوو هەر زوو دایک و بابێن من هاتنە با من لێ چاڤێن وان تژی گری بوون و دەڤێن وان تژی هاوار بوون وەختێ ئەز دیتیم د ئەوێ ڕەوشێ دا، نەخەرێن من یێن تالی بوون، پشتی هنگی و ل ڕۆژا ۲٠ـێ هەیڤا ۷ یا سالا ۲٠۱۷ـێ ئەز هاتمە رادەستکرن ژ بۆ مالباتا من و بابێ من ئەز برمە نەخوەشخانا گشتی ل باژێرێ دهۆک.

د بەردەوامییا پەیڤا خوە دا گۆت ژی،” من ژی وەکو ب هەزاران زارۆکێن ئێزیدی خواندنا خوە ژ دەست دا، و ئەز ژ خواندنا خوە دوورکەتم، و ئەڤێ چەندێ ژی کارتێکرنەکا نەرێنی لسەر ژیانا من کر و پاشەرۆژا من وندا کر .

ل تالیا پەیڤا خوە دا توماس گۆت،” هیڤیا من ئەوا د پاشەرۆژێ دا ئەز ل خواندنا خوە ڤەگەریم یان بکاربم بچمە دەرڤەیی عیراقێ دا کو ئەو هیڤێن من یێن داعشان دڤیان بکوژن ئەز لسەر کاربکەم و بجیهـ بینم و نهو ژی تەمەنێ من ۱۸ سالن و ژیانا خوە ل شنگال دەرباس دکەم.