ژنا ئێزیدی، پەیکەرەک ژ ئێشا و وێنەیا پێشڤەبرنا جڤاکێ
مەروان داود : ئێزدی ۲٤
پشتی جینۆسایدا سالا ۲٠۱٤ـێ ب سەرێ ئێزدیان هاتی، کەچان ژی مل ب ملێ کوران د ناڤ ئێزدیان دا د گەلەک بیڤان دا رۆلەکی مەزن گێران. و گەلەک ژ وان کەچان بوونە نموونێن جڤاکا ئێزدی لسەر ئاستێن بلند وەکو نادیە موراد و لەمیا بەشار و هتدد…
لدور ئەڤی بابەتی ” نیهاد سلێمان ” چالاکڤانەکا کەچە یا ئێزدیا ژ ئێزدی ۲٤ را وەسا گۆت : هەکە ئەم بەرێ خوە بدەنێ ب شێوەیەکی گشتی لسەر ئاستێ جیهانێ ئیرۆ ڕۆژ ژن و کەچان رۆلەکی گەلەک یێ مەزن هەیە د بیاڤێ ئاشتیێ و داهینان و گەلەک بیاڤێن دیتر دا، هەر وەسا بەری جینۆسایدا سالا ۲٠۱٤ـێ کەچا ئێزدی رۆلێ وێ د گەلەک بیاڤێن ژیانێ دا نەدهاتە خویاکرن لێ پشتی سالا ۲٠۱٤ـێ و سەرەرایی وێ هەموو زولم و زەحمەتە ب سەرێ کەچ و ژنێن ئێزدی دا هاتی بهێز لسەر خوە سەکەنینن و کاریبوون ببنە پێشەنگێن جڤاکا ئێزدی ل گەلەک جیهان و د گەلەک بیاڤێن ژیانێ دا
زیدەتر ژی گۆت : ئێک ژ نموونێن هەرێن بەرچاڤ یێن ئەم دبینن د نهو دا سالانە رێژەیەکا مەزن یا کەچان ژ زانکۆ و پەیمانگەهێن کوردستان و عیراقێ ژ بەشێن جودا جودا ب سەرکەفتیانە دەردچن و ئەڤە ژی نیشانا زیرەکی و لسەر خوەبوون و وێرەکییا وان دگەهینێت.
ل تالیا پەیڤا خوە دا گۆت : هیڤیخوازم ل پاشەرۆژەکا نیزینگ دا ڕەوشا ئێزدیان ب گشتی چێتر ببێت و داخواز دکەم هەر کەچەکە بەهرەیەک ل بال هەبیت شیانێن خوە زیدەتر پێش بیخێت و بکاربێت د پاشەرۆژێ دا خزمەتا جڤاک و خەلکێ خوە بکەت ژبەر د نهو دا ئێزدی ژ هەموو لایان ڤە پێدڤی ب پێشڤەچوونێ نە .
هەر لسەر هەمان بابەت” عەدلە بەکر ” کەچەکا ڕۆژنامەڤانە ژ ئێزدی ۲٤ را گۆت :
لسەر ئەڤی بابەتی ئەز دخوازم ئێکەم کەس وەکو کەچ ئەز خوە بکەمە میناك د ڕاستی دا بەری جینۆسایدا سالا ۲٠۱٤ـێ د هزرە من دا هەبوو ئەز کار دناڤ جیهانا ڕاگەهاندنێ بکەم، د هەمان دەم دا ئێک ژ حەز و خەونێن من بوو .
لێ د وی وەختی دا چەندین ئاستەنگ دکەڤتنە د ڕێکا من دا و گەلەک جاران ژی د دیتنا جڤاکێ ژی دا ئەڤ کارەکی گونجایی نەبوو ژ بۆ من لێ من بەردەوام کار لسەر حەز و هیڤێن خوە دکر و ل دوماهیێ من شیا ئەز ل پەیمانگەها ڕاگەهاندنێ بهێمە وەرگرتن و ب سەرکەفتیانا من ئەو بەش تەمام کر و کەفتمە د ناڤ جیهانا ڕاگەهاندنێ دا .
هەر وەسا ” عەدلە” دبێژێت ژی یا پێدڤی یە لسەر هەر کەسەکی ئێزدی یێ کو شیان هەبن بێ ل بەر چاڤ وەرگرتنا چ ڕەگەزان لگور شیانێن خوە کار لسەر کەیسا ئێزدیان بکەت، ژ بۆ گەهاندنا دەنگێ ئێزدیان ژ بۆ جیهانێ . گوتژی ڕۆلێ کەچان ژی یێ بەرچاڤ و ئەرینی بوو د گەهاندنا دەنگێ ئێزدیان ژ بۆ جیهانا دەرڤە، هەکە ئەم بەرێ خوە بدەنێ ب شێوەیەکی گشتی د جینۆسایدا ئێزدیان یا سالا ۲٠۱٤ـێ دا ڕێژەییا پتر یا قوربانیان کەچ بوون، هەر ژبەر وێ ئیکی یا فەرە کەچ بکاربیت وەک مرۆڤ بەرڤانیێ ژ خوە بکەت نەک وەک ڕەگەز، دگەل وێ ئیکێ ژی دەنگێ جڤاکا خوە بگەهینە جیهانێ .
” عەدلە ” ل تالیا پەیڤا خوە دا دبیژێت ئەز ب هیڤی مە ڕۆژەکێ مافێ راستەقینی یێ ئێزدیان لسەر دەستێ کەچان بگەهە ئێزدیان، و ب هیڤی مە هەر کەچەک لگور شیانێن خوە لسەر کەیسا ئێزدیان کار بکەت، گوتژی نهو لگور پێشەییا خوە وەک ڕۆژنامەڤان ب هەموو شیانێن خوە هەوول ددم دەنگێ خەلکێ شنگال و ئێزدیان بگەهینمە جیهێن بلند، د نهو دا ئەز پەیامنێرە کەنالێ KNN ـم ل شنگالێ .
هەر ل سەر هەمان بابەت کەچەکا دیتر یا ئێزدی ب ناڤێ” گولیستان شێخ ” وەسا ژ ئێزدی ۲٤ را گوت : ئەز ڕۆلێ کەچ و ژنێن ئێزدیان گەلەک بلند دنرخینم ب تایبەت پشتی فەرمانا سالا ٢٠١٤ ـێ یا ل شنگالێ ب سەرێ مللەتێ مە دا هاتی، نە بتنێ ئەم وەکو جڤاکا ئێزدی بەلکو هەموو مرۆڤایی ژی ب وێ خوەراگرییا کەچ و ژنێن ئێزدی یا سەربلندە ئەو خوەراگرییا وان ل بەرامبەر داعشان کری .
” گولیستان ” گوتژی ئێک ژ پەیامێن هەرێن جوان یێن ئێزدیاتیێ د دەرحەقا کەچان دا پێشکەشی جیهانێ و مرۆڤاتیێ ب گشتی کری ئەوبوو پشتی ئەو کەچ و ژن ژ دەستێ داعشان رزگاربووین ب سەربلندی و شانازیی ڤە قەبول کرن ئێزدی و بەردەوام پشتەڤانییە وان کرن، دا کو دەنگێ نزم یێ ئێزدیان بگەهینە جیهانا بلند و میناکە وان نادەیە موردا و فەریدە عەباس و لەمیە بەشار و هتدد..
” گولیستان ” ل تالیا پەیڤا خوە دا گوت : د ڕاستیدا ئەز د نهو دا بەرامبەر ڕەوشا ئێزدیان ب گشتی یا گەشبین نینم ژبەر د نهو دا ئێزدی نە بتنێ ژ شنگالێ بەلکو ژ هەموو دەڤەرێن خوە یێن ڕەسەن ل کوردستان – عیراق – تورکیا – سوریا کوچ دکەن دەرڤەیی وەلاتان و د ب رێکێن نە یاسایی دچنە ئەورپا و هیدی هیدی ڕەوشت و تیتالێن جڤاکی یێن ڕەسەن ئێزدیاتی ل رەفتارێن گەلەکە ژ وان دا کێم دبەن ب تایبەت گەنجان، ئەڤێ چەندێ ب پێنگاڤەکا مەترسیدا دبینم د پاشەڕۆژیێ دا، زیدەباریی وێ چەندێ د نهو دا ل سوشیال میدیایی پتریا جڤاکا مە هێریش دکەن ئێک و دوو د بەر شکەستنا ئێک دانە، ئەڤ چەندە د خزمەتا هیچ کەسەکی ژ مەدا نینە و ب هیڤی مە وەکو پێشبینێن من نەبیت ڕەوشا ئێزدیان د پاشەڕۆژیێ دا و ئێک بگرن و پەیامە وان یا ئێک گرتی بیت .
