ئێزیدی24 – مەروان داوود
“ڤەگەریان بۆ خوەندنێ” ل بن ڤی دروشمی رێکخراوا سەنڕایز بۆ گەشەپێدانا جڤاکی ب پشتەڤانیا دەستپێشخەریا نادیا مراد رابوویە ب نوژەنکرنا خوەندنگەهەکە بنەڕەتی ل کۆمەلگەها سیبا شێخ خدر ل باشوورێ رۆژئاڤایێ شنگال.
“حەماد حەجی” ئەندامێ رێکخراوا سەنڕایز ژ “ئێزیدی24” گۆت،“پشتی دەربازبوونا شەش سالا ژ دەربەدەریا خەلکێ هێدی هێدی پێلێت ڤەگەریانێ ژ بۆ دەڤەرێت جدا جدا یێت شنگالێ دەست پێ دکەن ژ وان دەڤەرا ژی کۆمەلگەها سیبا شێخ خدر و خەلکێ ڤەگەریایی ژی داخوازیا نوژەنکرن و ڤەکرنا خوەندنگەها دکرن دا زارۆکێت وان تێدا بخوەندن”.
بەردەوام بوو و گۆت،“ئەم وەک رێکخراوا سەنڕایز ب پشتەڤانیا دەستپێشخەریا نادیا موراد رابوون ب نوژەنکرنا خوەندنگەهەکە بنەڕەتی ل کۆمەلگەها سیبا شێخ خدر و دابینکرنا هەموو پێدڤیێت خوەندنگەهێ دگەل چێکرنا باخچەیەکی”.
حەجی زێدەتر ژی گوت،“بەری چەند هەیڤا ل بن دروشمێ “باشترین بەرسڤ بو جەنگا بەلابوونا ئاشتی و پشتەڤانیا پروسیا خوەندنێ یە”رێکخراوا مە هەر ب پشتەڤانیا دەستپێشخەریا نادیە مراد ل ناحیا تل عزێر ژی رابووبوو ب نوژەنکرنا خوەندنگەهەکێ ژبەر نوهە خەلکێ مە ژ هەر تشتەکی پتر پێدڤی ب خوەندنێ یە و خوەیاکر کە ئەو خوەندنگەهێت هاتینە نوژەنکرن دەواما هەردوو خوەندنێن عەرەبی و کوردی تێدا دهاتە کرن”.
“فارس فەلاح”، خەلکێ کۆمەلگەها سیبا شێخ خدرێ یە ل دۆر ڤێ پێنگاڤێ ژ “ئێزیدی24” رە گۆت،“فاکتەرێ هەرێ سەرەکی یێ کە رێکا ڤەگەریانێ ل پێش خەلکێ ڤەدکەت ئاڤەدانکرن و نوژەنکرنا دام و دەزگەهێت حکومی یێت گشتی یە ژ وان ژی خوەندنگەهـ ژبەر ئیرۆ رۆژ زارۆکێت مە پێدڤی ب خوەندنێ نە”.
زەلال ژی کر،“ئەڤ 6 مەهن ئەم ڤەگەریاینە شنگالێ و داخوازێ ژ وان هەموو رێکخراوا دکن یێت گرنگی ب خوەندن و فێرکرنێ ددەن هەر ب ڤەگەریانا خەلکێ رە دەست ب نوژەنکرنا خوەندنگەها بهێتە کرن دا خوەندنکار دەست ب خوەندنا خوە بکن”.