ئێزیدی24 – مەروان داود
ل سالێن تالی دا هژمارەکا مەزن ژ خەلکێ ئاوارە ژ ناڤ کەمپێن سنورێ پارێزگەها دهۆکێ بەرێ خوە دانە شنگال. و رێژەیەکا مەزن یا خۆرتان دناڤ وان مالباتا دا هەبوو، ئەوێن ڤەگەریاین ژی گازندا ژ نەبوونا دەرفەتێن کاری دکەن ل شنگالێ .
ژمارەکە مەزن ژ رێکخراوێن نیڤ دەولەتی ل شنگالێ هەنە، هەروەسا ئاڤاکرنەکە مەزن ل شنگال هەیە و خەلک حەوجەی دەستێ کاری یە لێ ژ بەر چەندین ئەگەرا خۆرت ئاستەنگا دبینن لدیتنا دەرفەتێن کاری دا.
هۆزان حەسەن یەک ژ وان خۆرتایە لدۆر ڤی بابەتی ژ ئێزیدی24 را گۆت،”ئەڤە نیزیک دوو سالایە ئەز ڤەگەریامە شنگالێ و ل سەنتەرێ باژێرێ شنگال یێ ئاکنجی مە هەر ژ دەمێ ئەز ڤەگەریامە و هەتا نهو ژی وەک کریکار بتنێ من دوو هەیڤان کار کرییە نە زێدەتر و بەردەوام ئەز ل کار دگەریم و پتریا وان دەرفەتێن کار یێن هەین کارێن ب زەحمەتن بەرامبەر دراڤەکی کێم و رێکخراوێن ل شنگالێ ژی هەین زوو ب زوو دەرفەتێن کار نادنە هەموو کەسان ژبەر پتریا ئەوێن ل رێکخراوا کار دکەن ب رێکا پەیوەندیێن خوە یێن کەسایەتی و واستەگەریێ ئەو کار ب دەستخوەڤە ئیناینە”.
زێدەتر گۆت،”نەبوونا دەرفەتێن کاری یەک ژ وان ئاریشێن مەزنە یێن ب سەر جڤاکێ دا دهێن و دبنە ئەگەرێ پەیدابوونا نەخوەشیان و ناکوکیان دناڤ جڤاکێ دا”.
ل تالیا پەیڤا خوە دا گۆت،”داخوازا من ژ ئالێن بەرپرس ئەوا ل شنگالێ ب چاڤەکی چێتر ل تەخا کرێکارا بنێرن و دەرفەتێن کاری یێن تایبەت ب پێشەیا وان ڤە ژ بۆ وان بەردەست بکن”.
لەیلا عەلی کەچەکە دی یا خەلکێ شنگالێ یە وەسا ژ “ئێزیدی24” را گۆت،”ئەڤ بۆ دەمێ زیدەتر ژ سێ سالایە ئەم ڤەگەریانە شنگالێ- کۆمەلگەها خانەسۆرێ دەرفەتێن کاری گەلەک دکێمن و ب تایبەت ژ بۆ کەچا ب ئێکجاری د کێمن، زێدەتر ژ سالەکێ ئەز دگەریام کۆ دەرفەتەکە کاری ب دەستخوەڤە بینم لێ گەریانا من یا بێ فێدا بوو و ئەو هەموو رێکخراوێن هەین ژی، پتریا وان کەسێن نیزینگ خوە و ب رێکا ناسکرنێ دەرفەتێن کاری ددەنە وان.
هەروەسا گۆت،”ژ بۆ رێڤەبرنا ژیانا خوە و مالباتە خوە ئەڤە بۆ دەمێ چەند مەهایە من دکانەکا بچووک ڤەکری یە و رۆژانە ب پێنج هەزارا هەتا دەهـ هەزارا کار دکم نە زێدەتر”.
ل تالیا پەیڤا خوە دا گۆت،”داخوازا من ژ وان هەموو رێکخراوێن ل شنگال کار دکن خوە ژ ئەوی قالبێ ناسی و واستەیان دوور بکنن و ب عەدلەت دەرفەتێن کار ب سەر خەلکێ دا دابەش بکن.
هەرووەسا “مەروان مراد” دەرچوویێ پشکا ئابووری یە ل زانکۆیا مووسل لدۆر ڤی بابەتی ژ “ئێزیدی24″ را گۆت،”دەڤەرەکە شەر و نەخوەشی ب سەر دا هاتبن، خەلکێ وێ پێدڤی ب ژێرخانەیەکا ئابووری یا باش هەیە و دڤێت ئەو رێکخراو و سەنتەرێن ل وێدەرێ هەین لدوویڤ بیردۆزێن ئابووری دەرفەتێن کار ب سەر خەلکێ دا بەلاڤ بکەن و ب چاڤەکی باشتر بەرێ خوە بدنێ”.
زێدەتر ژی گۆت،”مە چ ئامارێن دروست ل بەر دەست نینن بەس ئەز تەخمین دکم هژمارەکا ئێکجارا خەلکێ شنگال ل بن هێلا هەژاریێ دا دژین و راگەهاندنێ خوە ژ ڤی بابەتێ گرنگ دورئێخستیە و بەحس ناکەت”.
ل تالیا پەیڤا خوە دا گۆت،”ئەز پێشنیار دکم ژ بۆ هەموو ئالیێن بەرپرس هەماهەنگیێ دگەل کۆمپانیێن بیانی چێکن و ئەو بهێن پرۆژا ل شنگال ڤەکەن ب ڤی رێکێ ئەو کۆمپانی دێ پێدڤی ب هژمارەکا زێدە یا کارکەران بن و ئەو خەلکێ بێ کار ژی دێ دەرفەتێ ژ ڤێ چەندێ وەرگرن.