دکیومێنتکرنا جینۆسایدا ئێزیدیا ب رێکا کیتابا بەردەوامە

ئێزیدی24 ــ مەروان داوود

پشتی ل سالا 2014ـێ رێکخراوا تیرۆرستی یا داعش دەست ب سەر باژارێ شنگالێ دە گرتی و تاوانێت مەزن ل دژی خەلکێ دەڤەرێ ئەنجام داین ، و رێکخراوا ناڤهاتی دەست ب پەقاندنا جهێت پیرۆزێت ئۆلی یێت ئێزیدیا کری ل دەڤەرا شنگالێ، هەر زوو نڤیسەرا ب رێیا نڤیسینێ دەست ب دکیومێنتکرنا وان تاوانا کر ب زمانێت جدا جدا، و هەتا نوهە ژی ئەو دکیومێنتکرن یا بەردەوامە.

مەیسەر ئادانی نڤیسەرەکی ئێزیدی یە کیتابەکە تایبەت لسەر ژناڤبرن و هەڕفاندنا مەزار و جهێت ئۆلی یێت ئێزیدیا ژ ئالیێ داعش ڤە بەلاڤکر کە ئەڤ یەکەم بەرهەمێ وی یە.

نڤیسەرێ ناڤهاتی لسەر بەرهەمێ خوە رە ژ “ئێزیدی 24” ڕا گۆت، “هەر ژ سالێت دەستپێکێ یێت فەرمانا ئێزیدیا ل سالا 2014ـێ من دەست ب کۆمکرنا کیتابێت لسەر فەرمانێت ب سەرێ ئێزیدیا دە هاتین کر ل درێژاهیا دیرۆکێ دە، و هەتا نوهە من ب سەدا کیتابێت دکیومێنتکری کۆمکرینە و بەردەوامم لسەر کۆمکرنا وان، گەلەک جاران خوەندەنکارێت زانینگەهـ و پەیمانگەها یێت کە ڤەکۆلینێت خوە لدۆر فەرمانێت ئێزیدیا دنڤیسن پێدڤی ب ژێدەرا دبن و ئەز ژی هاریکاریا وان دکم”.

ئادانی خوەیاکر ژی، “پشتی پەقاندنا جهێت پیرۆزێت ئۆلی یێت ئێزیدیا وەکە قوب و نیشانگەها ل دەڤەرا شنگالێ من دەست ب کۆمکرنا زانیاریان کر لسەر وان جهێت پیرۆزێت هاتینە پەقاندن، و ب ئاوایەکی مەیدانی ئەز دگەریام و هەموو زانیاریێت من کۆمکرین من کرنە کیتابەک ب ناڤێ ( تهديم المزارات والرموز الدينية الإيزيدية ” داعش تتوارث معاول الجريمة )”.

ئاشکەرا کر ژی، ” نڤیسکار حەسۆ هورمی پێداچوون و خوەندنەکا پێشەکی ژێ رە کریە و رێنڤیسا زمانی ژی ژ ئالیێ نڤیسەر نەواف خەلەف ئەلسنجاری ڤەیە و بەرگێ وێ ژئالیێ حەسەن عومەر ڤە هاتیە دیزاینکرن و ژبا وەشانخانا لینا ڤە و پشتەڤانیا رێکخراوا ئێزیدی یا دکیومێنتکاری هاتیە چاپ و بەلاڤکرن و ژ 230 پەلی پێک دهێت”.

ئادانی ل تالیا پەیڤا خوە دە زەلال ژی کر،” ئیرۆ رۆژ یا گرنگە هەموو تاوانێت د درێژاهیا دیرۆکێ دە ب سەرێ ئێزیدیا دە هاتین بێنە نڤسین و دکیومێنتکرن دا کو نەئێنە ونداکرن، و ئەز ژی وێ بەردەوام بم لسەر نڤسین و دکیومێنتکرنا وان تاوانێت ب سەرێ ئێزیدیا دە هاتین و ب تایبەت ئەوێت لسەر دەستێ رێکخراوا تیرۆرستی یا داعش”.