ب رێیا کارێ خوە دەنگێ ملەتێ خوە دگەهینێ

ئێزيدی۲٤_باسم قاسم

كچا شێوەکار مەریەم مەروان ل سالا 1997 ل ناحیا تلعزێر ل باشوورێ چیایێ شنگالێ ژ دایک بوویە و نوهە ئاوارەیە و کۆمەلگەها خانکێ دمینە .

هەر ژ دەستپێکا وێ کۆمکوژیا بسەرێ ئێزیدیان دە هاتی و ئاوارە بوونا خەلکێ ئێزیدی ژ شنگالێ و ئاکنجی بوونا وان دلنێڤ کەمپان و کاڤلێن هەرێما کوردستانێ دە . وێ دەست ب چێکرنا تابلۆیان کریە و هەموو کارێت ئەو دکە
دەربرینێ ژ کۆمکوژیا ئێزیدیان ل رێکەفتی 3تەباخا سالا 2014ێ دکەن و بتایبەتی وان کەچ و ژنێن ئێزیدی ئەوێن کەتینە بن زلما تیرۆرستێن داعشێ دە و کڕین و فرۆتنا ب وان دئێتە کرن.

مەریەمێ ل دیدارەکێ دە ژ ئێزیدی۲٤ رە بەحسێ ل دەستپێکرنا کارێ خوەیێ چێکرنا تابلۆیان کر و گۆت، هەر ژ کچکانی ڤە کێفا من ژ کارێ چێکرنا وێنەیان رە دهات و ب دەربازبوونا عەمرێ من رە ل خوەندنگەهێ من و هەڤالێن خوەیێن وی دەمی بەردەوام وێنە لسەر کاغەتان چێدکرن و چەند ئەز مەزن دبوم بیتر کێفا من ژ ڤی کاری رە دهات و ئەو هەموو وێنەیێن من چێدکرن ب خوەشی و دیمەنێن جوانیا سروشتی ڤە دگرێدایی بوون.

بیتر گۆت، بەری سالا 2014ێ و تیرۆرستێن داعشێ کۆمکوژیێ لدەرهەقێ مە ئێزیدیان دە ئەنجام بدن من دەست ژ چێکرنا وێنەیان بەردا و دەست ب چێکرنا تابلۆیان کر لێ دەمەکا کورت تێرە دەربازبوو تیرۆرستێن داعشێ ئیریشکرنە سەر شنگالێ و کۆمکوژی ل بسەرێ مە ئێزیدیان دە ئانین و ئەم کۆچبەر و ئاوارە بوون ژ وارێ خوە و ب هەزاران ژ خەلکێ مە کەتنە بەر کۆمکوژی و رەڤاندنێ دە و زلم و زۆرداریەکە یەکجار مەزن ل کەچ و ژنێن مە ئێزیدیان هاتەکرن ژ ئالیێ وان تیرۆرستان ڤە لۆما هێڤینێ کەڤالێن من ئێن خوەشیان و دێمەنێن سروشتی هاتە گوهارتن ب دیمەنێن نەخوەش و چیرۆکێن تراژیدی ئێن کەچێن مەیێن دەستەسەر ل زیندانێن تیرۆرستێن داعشێ دە و ئەوێن ژ بن زلما وان قورتال دبن هەموو ژی یێن بووینە هێڤینێ کەڤالێن من د نوهە دا.

مەریەمێ گۆت ژی ، ژ دەمێ کۆمکوژیێ دە و هەتا نوهە ئەز ل کۆمەلگەها خانکێ ئاکنجێ مە و بەردەوام سەرەدانا وان کەچان دکم ئەوێن ژ دەستێ داعشێ دئێنە خەلاسکرن و هەتا نوهە من چێرۆکێن بیتر ژ 30کەچێن خەلاسبووین کرینە تابلۆ و بکارێ خوە چیرۆکێن وان دکەمە تابلۆ و ب رێیا پێشانگەهان ئەز ژ خەلکێ رە دیار دکەم چ ل بسەرێ مە ئێزیدیان دا هاتیە کرن.

ل تالیێ گۆت . ژ کارێ خوەیێ ڤە پێنچ سالا من هەتا نوهە هەفت پێشانگەهـ ڤەکرینە و ل چەند جهێن جوودا . یەک ژ وان ل کارفۆر ل باژێرێ دهۆکێ و سێ ژ وان ژ رێکخراوێن بیانی رە لنێڤ کەمپا خانکێ دە و دوو ژ وان ل پایتەختێ ژاپۆنێ ل تۆکیۆ و یەک ژ وان ل ئەمریکا بوو و پێشانگەها من یا بێ وێ ل وەلاتێ ئەلمانیا بێ و ئەز بزاڤێ دکەم هیش بیتر پێشانگەهێن خوە بەرو پێشڤە ببم دا بیتر کاربم ئیش و ئازار و کۆمکوژیا ملەتێ خوە ژ خەلکێ رە دیاربکەم.