ئێزیدی24 – مەروان داوود
ب درێژیا دیرۆکێ، جوگرافی و ستراتیژیا دەڤەرێت ئێزیدیا پرسگرێک و ناکوکیێت مەزن ل سەر هەبووینە و ب دەها فەرمان و جینۆساید ب سەرێ ئێزیدیا هاتینە ژ ئەگەرێ وان ناکوکییا.
ب سەر وێ یەکێ دا، ئێزیدیا دەست ژ ئاخا خوە بەرانەداینە و بەردەوام هەولداینە ل سەر ڤێ ئاخێ بمینن و بەردەوام بەرگری ژ ئاخا خوە کرینە و جارا تالی ژی ل وەختێ هێرشا داعش بۆ سەر شنگال بوو ل سالا 2014.
“دەلال خێری” کە یەک ژ قوربانیێت هێرشا داعشە ژ “ئێزیدی24” را گۆت،”ئەو جیێ مرۆڤ لێ دمینێ دکە هنەک پەیوەندی دگەل مڵلەت وخەلکێ جدا جدا چێببێ ئەوێت ل دۆروبەرێت دەڤەرێت مەڤێجا چ ئەو پەیوەندی دباشبن یا دخەراب بن”.
هەروسا گۆت،”ئەز دبینم کە جوگرافیا ئێزیدیا نە ئەگەرەکە سەرەکی بوو یا فەرمان و نەخوەشیێت ب سەرێ ئێزیدیا دا هاتین، بەلێ چێدبێ ببیتە ئەگەر ژی لێ نە ب شێوەیەکی راستەراست”.
بەردەوام بوو و گۆت،”نیزیک بوونا هنەک ژ هۆزێت عەرەبا ژ ئێزیدیا ب تایبەت ژی ئەوێت ل فەرمانا 2014ـێ دەست دگەل داعش دا هەین نیزیک بوونا جوگرافیا جیهێت وان و گوندێت وان هوکارێ سەرەکی بوو کە ئێزیدیا هەڤچەند قوربانێن سەرەکی دان، و هەکە ئەو جیهـ و گوندێت عەرەبا بەرفرەهتر بوون وێ مەترسیەکە مەزن ل سەر مە چێکن وەک ئێزیدی”.
“غانم سعید” خوەندنکارێ زانینگەها دهۆک پشکا جوگرافیا ئاماژە ب وێ یەکێ کر کە،” پتریا مڵلەتێت دنیایی ب ئەگەرێ جوگرافیا خوە گەلەک جارا بووینە قوربانی لێ ئێزیدی جدا ژ مڵلەتێت دی ژبەر ئێزیدی هەموو گاڤا قوربانیێت جوگرافیا خوەنە نە بتنێ ژ روویێ فەرمانا و شەرا ڤە بەلکو وێ جوگرافیا وان وسا ل وانە کریە کە کارتێکرنەکە نەرینێ بکەڤیە سەر زمان و چاند و کەلتوورێ وان”.
ل پەیڤا خوە دا ژ “ئێزیدی24″ را دیسا گۆت،” ژ لایەکی دیڤە تێکەلیا ئێزیدیا دگەل ئۆل و نەتەوەیێت جدا کارتێکرنەکە مەزن ل ئێزیدیا کریە و ب دیتنا من ئەڤ نیزیک بوون جوگرافیا وان ژ عەرەبا خالەکە سەرەکی یە کو هەتا نوهە نەهاتیە بەحسکرن ل بابەتێ نەڤەگەریانا خەلکێ شنگالێ دا”.
خوەیاکر ژی،” ژبەر باوەری ل نێڤبەرا وان و هنەک ژ هوزیێت عەرەبا دا نەما ئەو ژی ڤەدگەرێ وێ یەکێ کە ل وەختێ فەرمانا سالا 2014ـێ گەلەک ژ وان عەربیێت کە ل دۆروبەریێت ئێزیدیا جیهێ باوەریا ئێزیدیا بوون و ل دەمێ فەرمانێ خیانەت ل ئێزیدیا کرن”.