ئێزیدی24 ــ لەیت حسێن
“هیڤیا خوەیا زارۆکاتیێ من ب جی ئانی”، ئەڤ گۆتنا نازێ سلێمان کەچا ئێزیدی یا 18 سالی یە کە ب هیڤی بوو رۆژەکێ کار ل بوارێ شێوەکاریێ دە بکە و نهوە کار لسەر ڤەکرنا پێشەنگەهەکا تایبەت ب تابلۆیێت خوە دکە.
نازێ خەلکا کۆمەلگەھا بۆرکە ل باکوورێ قەزا شنگالێ ل رۆژئاڤایێ پارێزگەها نەینەوا، هەیاما شەش سالایە وەکە ئاوارە ل کەمپا دەرکارێ ل قەزا زاخۆ ئاکنجی یە.
شێوەکار نازێ ژ “ئێزیدی 24″ رە گۆت،”ژ زارۆکاتیێ دە هیڤیا من ئەو بوو ببم شێوەکار و رۆژەکێ بکاربم ئەو تشتێ ل بەرچاڤێ خوە بکم کەڤال ئەو بوو و پشتی من بزاڤ کری ب هاریکاریا مالا خوە ل سالا 2018ـێ من دەست ب ڤی کاری کر”.
هەروەها زەلال کر، “هژمارەکا زێدە ژ کەڤالێت وێ دەربڕینێ ژ ئێش و ئازارێت مڵلەتێ ئێزیدی دکن و هەروەها هۆشداریا ساخلەمی ژی ژبەر خوەپاراستنێ ژ ڤایرۆسێ کۆرۆنا ل کەڤالێت وێ دە خوەیایە”.
“نهوە کار لسەر ڤەکرنا پێشەنگەهەکێ دکم کە هژمارا هەرا زێدەترا کەڤالێت کە ئەزێ تێدە نیشان دم پرسا ژنا ئێزیدی خوەیا دکن لێ براستی پێدڤی ب هاریکاریێ مە”، “نازێیا شێوەکار” وەها گۆت.
نازێ خوەندەکارا پۆلا چارێ ئامادەیی یە و ب زمانێ عەرەبی دخوەندێ، سەرباری کە خوەندەکارە و وەکە ئەو دبێژە وەختەکی زێدە ددە کارێ وێنەکێشانێ ژبەر وێ دڤێ برێیا ڤی کاری هاریکاریا مالا خوە بکە.