پەرتووکەک ب سێ زمانان بۆ دۆکیومێنتکرنا کۆمەلکوژیا ئێزدیا هاتە بەلاڤکرن
ئێزیدی 24 _ لەیت حسێن
ب هەلکەفتا رۆژا جیهانی ئا ئاشتیێ و ب هادربوونا هژمارەکا دبلۆماتکار و قونسلێت گشتی یێت وەلاتێن بیانی و وەزیر و رێکخراوێت ناڤدەولەتی ل کۆنفرانسێ (پاشەرۆژا پێکڤەژیانێ پشتی داعش) ل هەولێرا پایتەختێ هەرێما کوردستانێ، رێ و رەسمێ ئیمزاکرنا پەرتووکا (ب سەرهاتیێن دۆزەخا داعش) ئا نڤیسەر و راگەهاندکارا ئێزدی “ریسالە شەرکانی” برێڤەچوو، کە ئەڤ پەرتووکە ب سێ زمانان هاتیە نڤیسین، و ئازارێن رۆژانێن بن دەستیا بیست ئافرەتێن ئێزدی یێن رزگاربوویێن دەستێ داعش بخوەڤە دگرە.
“ریسالە شەرکانی” نڤیسەرا ڤێ پەرتووکێ ژ “ئێزیدی 24” را پەیڤت و گۆت، هەر ژ بەرێ ڤە وەختێ من ل کارێ میدیایێ ژی کاردکر ل هزرا من دا بوو پەرتووکەکێ لدۆر ئافرەتا ئێزدی چێکەم لێ نە بڤی شێوەی کو ب مخابنی ڤە ب هەزاران کەچ و ژنێت ئێزدی کەتنە دەستێ داعش و سەرهاتیێن هەرا بزەحمەت ل بن دەستێ وێ رێکخراوا تیرۆرستیا داعش دا دیتن.
زێدەکر ژی، کە پەرتووکا وێ بناڤێ (ب سەرهاتیێن دۆزەخا داعش) ب سوپاسی ڤە ژئالیێ دەزگەهێ خێرخوازی یێ بارزانی ڤە ل چاپخانا ماردین هاتیە چاپکرن و 313 لاپەرن، کە ب هەر سێ زمانێت کوردی و عەرەبی و ئینگلیزی هاتیە نڤیسین و پێکهاتیە ژ چیرۆکێت بیست ئافرەتێن ئێزدی یێن رزگاربوویێن دەستێ داعش و رەوشا وان ئافرەتان پشتی قۆناغا رزگارکرنێ ژی دەتە خوەیاکرن.
هەروەسا خوەیاکر، کە ئەڤ چیرۆک ل ناڤبەینا سالێت 2014 و 2017ێ هاتبوونە نڤیسین کە وی وەختی پتر د پشتگۆهاڤێتی بوون و من ل وی دەمی ل رۆژنامەکێ ژی دا بەلاڤکرن سوپاسیا وان ژی دکەم کە هاریکار بوون بۆ بەلاڤکرنا ڤان چیرۆکانە دا خەلک هەموو بزانە چ بسەرێ مە هاتیە و چ ئێش و زەحمەتی مە دیتیە، و گۆتژی کەسوکارێت رزگاربوویان ژی رۆلەکی باش ل چێکرنا ڤێ پەرتووکێ دا هەبوو کە هاریکار و پشتەڤان بوون بۆ رزگاربوویان دا کو تاوانێن داعش بسەرێ وان ئانین و تراژیدیا ل بن دەستێ ڤێ رێکخراوا تیرۆری دیتین ئاشکەرا بکەن.
ریسالە ئاشکەرا ژی کر، کە ئەڤ پەرتووکە وێ بێ بەرامبەر لسەرانسەری پەرتووکخانێن کوردستانێ ئێتە بەلاڤکرن و وێ بۆ وەلاتێن ژدەرڤە ژی تایبەت ئۆروپا و ئەمریکا هێتە شاندن و هیڤیا من ژی ئەوە کە ببتە بەلگەیەک بۆ دادگەهێ دا کەیسا ئێزدیا ب جینۆساید بێتە ناساندن.
ل تالیێ ژی گۆت، کە ئەو گەلەک کەیف خوەشە و وژدانا وێ ئا ئارامە کە هەر چەندە ب تشتەکی بچووک ژی کاری یە خزمەتا کەیسا ئێزدیا بکە و تراژیدیا بزەحمەتا ئێزدیا بگەهینتە جهێت کاربدەست.
