پەرتووکا “هۆنەری پیرۆز” کە تایبەتە ب کەلتورێ ئێزيدیا هاتە چاپکرن
ئێزیدی 24 _ لەیت حسێن
ل چارچۆڤێ زنجیرا پەرتووکێت کە رێکخراوا رۆژا شنگال چاپدکەت، ئیرۆ رۆژا یەک شەمبیێ رێکەفتی 6-10-2019 پەرتووکا چارێ بناڤێ “هۆنەری پیرۆز” ئا هۆنەرمەند و نڤیسەر حەمە هاشم چاپکر کە زانیاریێت پر بەها سەبارەت کەلتورێ ئێزدیا بخوەڤە دگرە، و نڤیسەرێ ڤێ پەرتووکێ ژی خوەیا دکەت کە ئەڤ پەرتووکە بزاڤەکا ئەنتۆگرافیانەیە ل بوارێ کەلتورناسیێ دا.
“حەمە هاشم” نڤیسەرێ پەرتووکا “هۆنەری پیرۆز” ژ “ئێزیدی 24” را خوەیاكر، ئەڤ پەرتووکە 96 لاپەرن و بزاڤەکا ئەنتۆگرافیانەیە ل بوارێ کەلتورناسیێ دا، من دڤێت تێدە تیشکێ ب ئێخمە سەر ئالیەکی زۆر زیندی کەلتور و ھۆنەرێ کوردی، ھەروەھا رۆناهیێ ب ئێخمە سەر ھند دیمەنێن زۆر دانسقە کە هەتا نهوە ژی گەلەک ژ مە نزانیە خوەدانێت ئادگاریێت ھندە پیرۆز و جوانین کە لێوانلێون ژ ھۆنەر و کەشی مرۆڤدۆستیا بلند. ئەو ژی ھۆنەرێ زیندیێ ئێزدیانە ل کوردستانێ.
گۆتژی، ئارمانجا من ژ ڤێ پەرتووکێ ناساندنا کەلتورێ جوانێ ئێزدیایە ب کوردان ب گشتی، چونکی ئەم ھەموو دزانین کورد ل بنەرەتدا رۆژ پەرست بوون و نهوە ژی ب ئەگەرێ گۆهۆرینان و فەرمانێت جۆراوجۆر ھندەکا ئایینێ خوە گوهۆری، مە ئەڤ پەرتووکە وەسا خوەیاکریە کە بنەمایێ کەلتوورێ رەسەنێ کوردی ل مەراسیم و کەشێ ئایینێ ئێزدیا دا هەیە کە دڤێت ئەم ھەموو شانازیێ پێ بکەین.
هەروەها ئاشکەرا کرد کە ژبلی ڤێ پەرتووکێ، من سێ پێشەنگەهێت شێوەکاریێ ل سەر کۆمکوژیا ئێزدیا ل شنگالێ ڤەکرن، ھەروەھا سالا 2016ێ کارەکی لاند ئارت من ل چیایێ شنگال و شەرفەدین کر ل شنگال کە پێکهاتبوو ژ 3000 فرفرۆکەیێت زارۆکا کە دەربڕین دکر ژ 3000 ژنێت رەڤاندیێت دەستێت داعش.
دا خوەیاکرن ژی، کە ئەڤ یەکەمین پەرتووکە سەبارەت ئێزدیان وی چێکری. بەلێ گۆت، ئەز ل بزاڤان دا بەردەوام دبم ، دگەریم بزانم باب و باپیرێت مە کە چ کرینە ل سەر ئایینێ میترایی و زەردەشتی و ئێزدی بوون، چونکی باوەریا من وەسایە ئەگەر کەسەکی بڤێت خوداناسیێ بکەت ئەڤە ئێزدیاتی باشترین رێیە، چونکی ئێزدیاتی ھێلا پەیوەندیا خوە و خالقێ دونیا ل ھۆنەردا دبینێت.
حەمە ھاشم ل سالا 1973 ل باژارێ کۆیە ژ دایک بوویە ھۆنەرێ وێنەکێشانێ خواندیە، نهوە ژی مامۆستایە ل پەیمانگەها ھۆنەرێن جوان ل ھەولێر، چەندین پێشانگەهێت شێوەکاریێ ڤەکرینە، ژبلی ل بواری نڤیسینێ دا خوەدانێ سێ پەرتووکایە و ل گەلەک ژ رۆژنامە و گۆڤاران بابەتێت ھۆنەری و رەخنەیی نڤیسینە.
